Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Exodus is e Biebelbook oet 't Aajd Testamint en wel 't twiede; 't maak deil oet vaan de Pentateuch (ofwel Thora). 't Book besjrijf de oettoch vaan de Joede oet Egypte nao Kanaän; de naom beteikent daan ouch "Oettoch". De Hebreeuwse naom veur dit book is שמות. Euverdrachtelek beteikent 'nen exodus "'nen oettoch vaan väöl lui tegeliek". De feite in Exodus weure gemeinlek al väöl mie historisch betrouwbaar geach es die in Genesis.

De nuie farao oonderdrök 't Joedse volk en liet alle Joedse jungskes in de revier werpe (1). Mozes oontkump dit lot ouch neet, meh weurt door de dochter vaan de farao oet 't water gehaold (2). Es heer opgreujt weurt heer gerope door de Hier dee häöm (3) en zie broor Aäron (4) opreup bij de farao aon te dringe op d'n oettoch vaan de Joede. Es ze dat doen versterk de farao zien onderdrökking allein mer (5), boenao God Mozes en Aäron obbenuits veur ziech reup, en oetlègk wat Heer zal doen gebäöre (6). Wienie de farao ze neet liet goon sjik God tien plaoge op Egypte en de farao aof (7 t/m 14). Pas nao de tiende plaog, wienie alle ajdste jonges vaan de Egyptenere sterve, liet heer de Joede oet 't land trèkke.

De Joede beginne weg te trèkke (14) en wie de farao ziech weer bedink en soldaote achter hun aon sjik liet God de Roej Zie druugvalle, en achter de Joede wier slete (15). Naotot ze in de weuste beproof zien gewees (15) liet de Hier 't manna regene oet d'n hiemel (16). In de weuste weure ze door de Amalekiete aongevalle (17). Daan kump Mozes ziene sjoenpa Jetro, dee häöm zien vrouw en kinder mètnump en häöm aonraojt riechters aon te stèlle (18). Op de berg Horeb versjijnt de Hier aon Mozes (19) en opebaart de Joede de tien gebojer (20). Daonao volge nog e paar aander wètte (zuug Steine taofele; 21 t/m 24). Daan lègk heer oet wie de in Jeruzalem te bouwe tempel oet moot goon zien (25 t/m 31).

De Joede make daan 'n aofgodsbeeld, 't Gouwe Kaaf, wat God laojend verweus. Mozes smiet de steine plate kepot (32). God gief daonao nui plate en waarsjouwt 't volk (33, 34). Tenslotte gief de Hier hun religieus intructies (35 t/m 40).