Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Dit artikel geit euver 't Frans dörpke, bekindj veur zien megaliete; veur 't Egyptisch tempelcomplex, zuuch: Karnak.

Carnac (Bretoens: Karnag) is e dörpke ane zuudkus van Bretagne, Frankriek. 't Steit veural bekandj veure taalrieke prehistorische monumenten in 't boetegebied. Dees monumente zeen groeate stein, megaliete, die m'n in petroeanen of allein opgetroch haet.

Bekandje steinpetroeanen in Carnac zeen die van Le Menec en Kermario. Ómme gans staon dao nag zoea 2600 vanne oearsprunkelike 11.000 stein. Óngersjied maak me tösse de tösse de menhirs (alleinstäöndj of in rieje), de cromlechs (steinkring) enne dolmen (graafheuvele). Dinkelik zeen dees steine monumente verbónje mit prehistorische sjamanistische rituelen en is me róndj 5000 v.Chr. aangevange mitte boew daovan. Hiemit vörme zie de aadste boewwerke van Europa. Me wètj nag ummer neet wie me de groeate stein oppe plaats gekregen haet.

Me nump aan det väöl vanne megaliete gekoppeldj woren aan rituelen ómme zón enne maon en det zie gebroek woorten es 'n saort klender. Wie de Kelte róndj 400 v.Chr. aankomen in Bretagne, broekdje zie ouch de monumente veur religieus plechtigheje.