Uman
Uman, ofisial la Sultania Yman, es un pais arabi a la costa sude-este de la Penisola Arabi.
Ocupante un loca stratejial importante a la boca de la Golfo Persian, la pais ave fronteras con la Amirias Arabi Unida a la norde-ueste, Arabia Saudi a la ueste, e Iaman a la sude-ueste, e ave fronteras maral con Iran e Pacistan. La costa es formida par la Mar Arabi a la sude-este e la Golfo Uman a la norde-este. La esclaves Madha e Musandam es ensircada par la AAU a sua fronteras teral, e la Streta Hormuz (compartida con Iran) e la Golfo Uman formi la bordas costal de Musandam.
De la tarda de la sentenio 17, la Sultania Uman ia es un impero potiosa, competente con Portugal e Britan per influe en la Golfo Persian e la Mar Indian. A sua zenite en la sentenio 19, la influe o controla umani ia estende ultra la Streta Hormuz asta lo cual es aora Iran e Pacistan, e asta tan sude como Zanzibar (aora un parte de Tanzania). Cuando sua potia ia diminui en la sentenio 20, la sultania ia veni su la influe de la Rena Unida.
Istorial, la capital Mascat ia es la porto xef de comersia en la rejion de la Golfo Persian. Muscat ia es ance entre la portos comersial la plu importante en la Mar Indian. La relijio ofisial de Uman es islam.
Uman es un monarcia asoluta. La sultan Qaboos bin Said al Said es la renor erital de la pais de 1970. Par longia de periodo de posto, el esede tota otra renores presente en Asia sude-ueste, e es la numero cuatro de la monarcas presente renante en la mundo.
Uman ave reservas modesta de petrolio, ocupante la loca 25 global. An tal, en 2010 la Program de la Nasiones Unida per Developa ia gradi Uman como la nasion la plu bonida de mundo par causa de sua developa en la 40 anios presedente. Un parte major de sua economia envolve turisme e la comersia de pexes, datilas e alga produidas cultival. Esta distingui Uman de la economias de sua visinas, cual depende xef de petrolio.
Uman es categorida como un economia de revenu alta, e es gradida como la pais 74 de mundo longo la Indise Global de Pas.
La area es sirca 212 460 cilometres cuadrida. La cuantia de abitores, en la anio 2007, ia es sirca 3 204 897 persones. La lingua major es arabi.
Text is available under the CC BY-SA 4.0 license; additional terms may apply.
Images, videos and audio are available under their respective licenses.