Scrive maia, acc glifos maia, ia es la sistem de scrive de la sivilia maia de Mesoamerica e es la sola sistem de scrive de la area cual ia es decodigida. Espertas acorda ce la popla maia ia developa la sola sistem de scrive completa en Mesoamerica. La enscrives la plu vea trovada orijina en la sentenio tre aec, trovada en San Bartolo, Guatemala. La scrive ia es usada continual tra tota Mesoamerica asta la concista espaniol de la maia en la sentenios 16 e 17.

Scrive maia ia usa logogrames, completida con un grupo de glifos silabal. La esplorores european, cuando los vide prima la scrive maia, nomida lo "ieroglifos" per la similia, an si los no es relatada. La linguas maia moderne es scriveda con la alfabeta latina.

La scrive maia es composada de un colie de glifos detaliosa cual ia es laborosa pintada sur ceramicas, mures, manuscritos de paper fabricada de cortex, siselida en lenio e petra, e moldida en stuco. La glifos siselida e moldida ia es pintada, ma la pinta no ia survive comun. En 2008, la sona de sirca 80% de scrive maia ia pote es lejable, e la sinifia de sirca 60% ia pote es comprendeda con grados variante de sertia, ma sufisinte per dona un idea completa de sua strutur.

Testos maia ia es scriveda tipal en blocos ordinada en colonas de du blocos larga, con cada bloco represente un formula nomin o verbin. La blocos en la colonas ia es lejeda de sinistra a destra, alta a basa, e repeteda asta no colonas resta. En un bloco, glifos ia es ordinada alta a basa, sinistra a destra.

La scrive ia es un sistem logografial con alga elementos silabal o gramatical. Glifos o simboles pote represente o un morfem o un silaba, e la mesma glifo pote es usada per ambos. Glifos usada como silabogrames ia es orijinal logogrames per parolas de un silaba, tipal los cual fini con un vocal o un consonante "debil" como /j/, /w/, /h/, o /ʔ/. Per esemplo, la logogram per "pina de pex" (cual ave du formas: un pina o un pex con pinas grande) ia es lejeda como kah e ultima ia es usada per la silaba ka. La glifos fonemal ia represente silabas simple de consonante-vocal (CV) o sola vocal (V). Ma la fonotatica per maia ia es alga plu complicada ca esta: La plu de parolas maia ia fini con consonantes, e alga ave segues de du consonantes, como en la parola xolte' (/ʃolteʔ/, setro), cual es CVCCVC. Cuando esta consonantes ia es sonantes (l, m, n) o larinjales (j, h, ') los ia es a veses iniorada ("suspeleda"). Plu comun, la consonantes ia es scriveda, cual sinifia ce un vocal estra ia es ance scriveda. Esta ia es tipal un repete ("eco") de la vocal de la silaba a ante. Per esemplo, la parola kah ia es suspeleda como ka o scriveda completa como ka-ha.