De Ranger-Programm ass en US-amerikanesche Raumfaartprogramm vun néng Raumsonden, déi tëscht 1961 an 1965 op den Äerdmound geflu sinn an do virum Opschlag Biller iwwerdroen hunn. De Programm gouf vun der NASA duerchgefouert a stoung ënner der Leedung vum JPL.

Scho beim Pioneer-Programm sinn néng US-Sonden op den Äerdmound geflunn. Dobäi war eleng de Fluch vu Pioneer 4, de 4. Mäerz 1959 laanscht de Mound en Erfolleg, déi aner aacht Sonde waren alleguer Feelschléi.

No der Ukënnegung vum US-President John F. Kennedy am Abrëll 1961, bis zum Enn vum Joerzéngt e Mënsch op de Mound ze bréngen, huet d'NASA hir Beméiunge intensivéiert. De Programm Ranger war en Allzweckprogramm. Et huet fir Tester vu Manöveren am Raum gedéngt, souwéi der Virbereedung fir Landung um Mound. De Ranger-Projet gliddert sech an dräi Bléck:

Block I

D'Sonden 1–2, 306 kg schwéier, sollten Äerdsatellite bleiwen, awer an de moundnoe Raum an doriwwer eraus virstoussen (mat engem Apogeum vu ronn 1 Mill. km).

Block II

Déi 330–340 kg schwéier Sonden 3–5 sollten op dem Mound opschloen an onmëttelbar virdru Biller iwwerdroen. Virdru sollt d'Mammesond eng ronn 40 kg schwéier Instrumentekapsel ausstoussen, déi geschützt an engem kugelfërmege Gehais aus Balsaholz den Opschlag no e puer Spréng onbeschiedegt iwwerstoe sollt. U Bord vun der Kapsel war ënner anerem en einfache Seismograph.

Block III

Bei de Sonde 6–9 mat engem Gewiicht vun 365 kg gouf no de Feelschléi vu Block II op eng „mëll Landung“ verzicht, a mat Hëllef vu sechs Kameraen, héichopléisend Fotoe virum Opschlag ugestrieft.

• Ranger 1 ass den 23. August 1961 gestart a konnt wéinst engem Feeler an der Rakéit en niddregen Äerdorbit net verloossen. De Satellit ass den 30. August 1961 vergloust, nodeem schonn dräi Deeg virdrun d'Kommunikatioun ofgebrach war.
• Ranger 2 ass den 18. November 1961 gestart an hat en änlecht Ongléck wéi Ranger 1. De Satellit ass den 20. November 1961 vergloust.

• Ranger 3 ass de 26. Januar 1962 gestart, wéinst ze héijer Vitess flitt d'Sond laanscht de Mound an eng Sonnenëmlafbunn. D'Sond iwwerdréit keng Biller, an ass verluer.
• Ranger 4 ass den 23. Abrëll 1962 gestart, dobäi brécht de Kontakt mat der Sond nach de selwechten Dag of. D'Sond ass de 26. Abrëll 1962 op der Récksäit vum Mound opgeschloen. Ranger 4 war trotz Feelschlag déi éischt US-Raumsond, déi d'Mounduewerfläch erreecht hat.
• Ranger 5 ass den 18. Oktober 1962 gestart, och do gouf et schonn den éischten Dag e Kommunikatiounsofbroch. D'Sond war ronn 700 km wäit laanscht de Mond geflunn a koum an eng Sonnenëmlafbunn.

• Ranger 6 ass den 30. Januar 1964 gestart an ass den 2. Februar 1964 um Mound opgeschloen. D'Kamerae konnte virum Opschlag net aktivéiert ginn.
• Ranger 7 ass den 28. Juli 1964 gestart an ass den 31. Juli 1964 op dem Mound am Mare Cognitum opgeschloen. D'Sond hat virum Opschlag 4300 Biller iwwerdroen.
• Ranger 8 ass de 17. Februar 1965 gestart an ass den 20. Februar 1965 um Mound am Mare Tranquillitatis opgeschloen. D'Sond hat 7300 Biller iwwerdroen.
• Ranger 9 ass den 21. Mäerz 1965 gestart, an ass de 24. Mäerz 1965 am Krater Alphonsus opgeschloen. D'Sond hat 5800 Biller iwwerdroen. Den Opschlag ass live an der US-Televisioun gewise ginn.

Ranger war mat sechs Feelschléi, awer enger zum Schluss zefriddestellender Erfollegsquot vun 33% méi erfolgräich wéi de Pioneer-Moundprogramm. De Programm hat d'USA am Ganzen 170 Mio. US-Dollar kascht. D'Programmer duerno ware Surveyor a Lunar Orbiter.

• Lëscht vun onbemannte Raumfaartmissiounen
• Lëscht vun de kënschtlechen Objeten um Äerdmound

• Bernd Leitenberger: Ranger Moundsonden
• (en) Lunar Impact - A History of Project Ranger, Online-Versioun vun engem NASA-Buch