Rue Plaetis

Numm	lb: Plaetisgaass fr: Rue Plaetis
Fréieren Numm	fr: rue des Tanneurs de: Altmünstergasse, Plaetisgasse
Längt	ca.195 m
Land	Lëtzebuerg
Gemeng	Lëtzebuerg
Uertschaft	Lëtzebuerg
Quartier	Gronn
Postcode	1136
Koordinaten	49° 36’ 34.3’’ N       06° 08’ 05.4’’ O

D'Plaetisgaass, offiziell rue Plaetis, ass eng Sakgaass am Stadgronn déi vun der Montée du Grund bei d'Uelzecht an d'Gäert vum Stierchen féiert.

Am Mëttelalter gouf et eng Bréck, déi vun der Plaetisgaass iwwer d'Uelzecht an d'Mënsterstrooss (deemools Spidolsstrooss) gefouert huet

Schonn am Joer 1281 gëtt eng Pletisborne zitéiert, an e puer Joer méi spéit ass vun der Plettinsgassa rieds (1297). Et gëtt ugeholl, datt den Numm vum laténgeschen in plateis hierkënnt, woubäi platea eng Paweesstrooss bezeechent. Bis am 17. Joerhonnert war d'Plaetisgaass eng wichteg Verbindung tëscht der Schmëdd ënner dem Bockfiels an dem Almënsterplateau. Duerch de Bau vun der 3. Rankmauer gouf et eng Sakgaass.

Am Mëttelalter a bis an d'17. Joerhonnert era war d'Plaetisgaass bekannt fir hir Buedstuffen. D'Waasser vum Plättisbur war deemools wéinst senger gudder Qualitéit an der ganzer Stad geschat. 1374 gëtt an engem Akt e Bued- a Schweesshaus ernimmt, d'"Johann Plettismeister Hus".

Wéinst Angscht virun Epidemië sinn am 17. Joerhonnert déi Buedhaiser lues a lues verschwonnen an hunn de Gierwereie Plaz gemaach, déi bis an d'19. Joerhonnert d'Bild vun der Gaass bestëmmt hunn, wat zu hirem schlechte Ruff bäigedroen huet. Deemools housch d'Gaass rue des Tanneurs.

De Plettisbur huet als ëffentleche Wäschbuer bis am Joer 1910 existéiert an ass dunn an den Neibau vun der Händschefabrick verbaut ginn^[1].

Schonn an Dokumenter aus dem 13. Joerhonnert gëtt d'Strooss als Plectis, Plettis, Plaetys, Plettes, Plettisborn oder Plettisgas, asw. ernimmt.

Eng aner al Bezeechnung vun der Plaetisgaass soll bis am 15. Joerhonnert Altmünstergass gewiescht sinn^[2]. Spéider housch se wéi gesot rue des Tanneurs^[3],[4]. An der Besatzungszäit am Zweete Weltkrich housch se Plaetisgasse^[5].

• 
  1834. "Rue des Tanneurs". Zeechnung, Nicolas Liez.
• 
  Den Ufank vun der Plaetisgaass, vum Neie Wee (Sosthène-Weis-Strooss) aus gesinn. Hannen am Bild d'Tilleschgaass.

• Beck, Henri, 1992. Was bedeuten die Straßennamen der Stadt? Ons Stad Nr. 41: 32. Pdf
• Beck, Fanny, 2005. Was bedeuten die Straßennamen der Stadt? Ons Stad Nr. 80, S. 19. Pdf
• May, Guy, 2002. Die Strassenbezeichnungen der Stadt Luxemburg unter deutscher Besatzung (1940 - 1944). Ons Stad N° 71: 30-32.
• Van der Vekene, Émile, 2009. L'ancienne Maison van der Vekene au Grund. Essai iconographique. Hémecht: Zeitschrift für Luxemburger Geschichte Jg. 61 (H. 3): 403-424.
• Zettinger, Léon, 1963. Vieilles rues de la ville de Luxembourg. Hémecht 15/2: 143-167.

Commons: Plaetisgaass – Biller, Videoen oder Audiodateien

1. ↑ Quell vun dësem Kapitel Geschicht: Beck 1992 an der Literatur.
2. ↑ Cf. Zettinger 1963: 147 an der Literatur.
3. ↑ Net ze verwiessele mat der haiteger Rue des Tanneurs am Pafendall, cf. Beck 2005 an der Literatur.
4. ↑ Cf. van der Vekene 2009:403 an der Literatur.
5. ↑ Cf. May 2002: 31 an der Literatur.