Cetonia aurata
Aner Sproochen:	de: Goldglänzender Rosenkäfer fr: Cétoine dorée
Systematik
Räich: Déiereräich Stamm: Arthropoden Klass: Insekten Uerdnung: Kiewerleken (Coleoptera) Ënneruerdnung: Polyphaga Famill: Scarabaeidae Ënnerfamill: Cetoniinae Gattung: Cetonia
Wëssenschaftlechen Numm
Cetonia aurata (Linnaeus, 1758)

Cetonia aurata ass eng Kiewerleks-Aart aus der Famill vun de Scarabaeidae.

D'Kierwerleke gi 14 bis 20 Millimeter grouss. Uewendrop si se variabel metallesch gréng bis bronzefaarweg, woubäi jee no Liicht den Toun och an d'Blomooft, respektiv an d'Gëlle goe kann. Déi ënnescht Säit ass routgëllen. Op den Deckflilleke si wäiss Flecken, eng wäiss Sträif a Queeschrillen ze gesinn. D'Männercher hunn, anescht wéi d'Weibercher, eng flaach längelzeg Fuer um Bauch.

Cetonia aurata kënnt an Europa, nërdlech bis an de Süde vunn Norwegen a bis an Zentralschweden a -finnland vir. No Osten hin ass en iwwer Klengasien, Viischt Asien a Sibirien bis an den Nordwesten vu China ze fannen. Op de Britteschen Insele kënnt e just lokal vir. E flitt vun Abrëll bis Oktober.

D'Imagines fënnt een heefeg op Bléien, zum Bresipill vu Rousen, Uebsttraich, Hielenter oer Wäissdar. D'Eeër gi gär a muuuschtescht Holz oder Kompostkéip geluecht. No e puer Woche kommen wäiss, kromm Larven eraus, déi 5 Zantimeter grouss kënne ginn. Si verpoppe sech an engem Kokon aus Buedem an Holzfaseren. Et dauert zwee Joer vun der Larv bis zum ausgewuessene Kierwerlek. Dës iwwerwanteren awer nach am Buedem, ier se dann dat Fréijoer drop erauskruebelen.

• 
  Larv
• 
  Popp
• 
  Erwuessent Exemplar
• 
  mat de Flilleken auserneen
• 
  Fluchmuster
• 
  Faarfvariatiounen
• 
  op enger Dëschtel

Commons: Cetonia aurata – Biller, Videoen oder Audiodateien