დიმიტრი თაყაიშვილი (დ. 6 იანვარი, 1919, თბილისი — გ. 28 მარტი, 1998, იქვე) — ქართველი მხატვარი და მსახიობი. საქართველოს სახალხო მხატვარი (1985). საქართველოს ხელოვნების დამსახურებული მოღვაწე (1967)

დაიბადა 1919 წლის 6 იანვარს ქ. თბილისში. 1934–38 წლებში სწავლობდა სამხატვრო სასწავლებელში, ხოლო 1938–44 წლებში თბილისის სამხატვრო აკადემიის ფერწერის ფაკულტეტზე. 1944–45 წლებში კვალიფიკაციის ასამაღლებლად მივლინებული იყო მოსკოვის ფერწერის ინსტიტუტის დეკორატიულ სახელოსნოში პროფ. მ. ბობიშევთან. მუშაობდა მთავარ მხატვრად მოსკოვის მოძრავ მუსიკალურ თეატრში (1945), ხოლო დამდგმელ მხატვრად მოსკოვის საოლქო მუსიკალურ (1946–47) და ქ. ნოგინსკის საოლქო დრამატულ (1947-48) თეატრებში. 1949-51 წლებში თბილისის მოზარდ მაყურებელთა ქართული, ხოლო 1952-57 წლებში ქუთაისის თეატრების მთავარი მხატვარია. 1955 წელს ქუთაისში დააარსა სამხატვრო სკოლა. 1957 წლიდან მოღვაწეობდა კინოსტუდია „ქართულ ფილმში“. დამდგმელი მხატვარია ფილმების: „განაჩენი“ (1959), „თეთრი ქარავანი“ (1963), „მე ვხედავ მზეს“ (1965), „ჯვარცმული კუნძული“ (1968), „მხიარული რომანი“ (1972), პირველი მერცხალი (1975) და სხვა.

1968 წლიდან ხელმძღვანელობდა თბილისის სამხატვრო აკადემიის კინოსა და ტელევიზიის სახელოსნოს. 1976–86 წლებში იყო მხატვართა კავშირის გამგეობის მდივანი. ფერწერის ფაკულტეტის პროფესორი (1985).

გარდაიცვალა 1998 წლის 28 მარტს. დაკრძალულია თბილისში, მწერალთა და საზოგადო მოღვაწეთა დიდუბის პანთეონში.

• 1967 — საქართველოს ხელოვნების დამსახურებული მოღვაწე
• 1985 — საქართველოს სახალხო მხატვარი

• როცა აყვავდა ნუში
• აურზაური სალხინეთში
• მოხეტიალე რაინდები
• იყო შაშვი მგალობელი

• დიმიტრი თაყაიშვილი — საქართველოს ბიოგრაფიული ლექსიკონი
• დიმიტრი თაყაიშვილი — ეროვნული ფილმოგრაფია
• დიმიტრი თაყაიშვილი — კინოფილმების ინტერნეტ მონაცემთა ბაზა (ინგლისური)
• დიმიტრი თაყაიშვილი დაარქივებული 2023-10-21 საიტზე Wayback Machine.