Dawn esas kosmoprobilo di NASA, la unesma probilo qua exploris Vesta e Ceres, du asteroidi en la asteroido-zono. La skopo di la misiono esis saveskar, per studiado di tala granda objekti en la asteroido-zono, kelke pri la formaco di la sunala sistemo. On ja savis ke Vesta esas rokoza, e ke Ceres esas glacioza.

Ol lansesis ye 27ma di septembro 2007. Ol portis kameri, spektroskopo por videbla ed infrereda lumo, ed instrumento por trovar gama-radiado e neutroni, qua mezuris la prezenteso di elementi qui formacus roki.

En februaro 2009 ol preterpasis Marso, ye disto 549 km, tale ganante rapideso. Ol eniris orbito cirkum Vesta ye 16ma di julio 2011.

Dum 14 monati ol studiis Vesta, ganante informeso per qua geologiala mapo kreesis. Pose ol voyajis a Ceres. Ol eniris orbito cirkum ta asteroido ye 6ma di marto 2016, e sucesoze studiis la surfaco. Depos la fino di la misiono en novembro 2018, kande fuelo esis konsumita, la ne-funcionanta probilo restas en orbito cirkum Ceres.