Dame o lude de damas es un strategic tabul-lude por du lusores. It appartene al ludes con perfect immitation. Pro to es possibil strategies de lude, queles ne depende del hasard. In Russia e Nederland it existe quam professional sport.

On lude dame sur un tabul con alternant blanc e nigri quadratic campes. On usa tabules con 8×8, con 10×10 o mem con 12×12 campes.

Li figuras es rond e plat. Un lusor lude con nigri (o rubi), li altri con blanc figuras. Si on lude sur un 8×8-tabul, chascun lusor have 12 figuras; si on lude sur un 10×10-tabul, chascun have 20 figuras.

On lude solmen sur li nigri campes. Li figuras ea un camp in diagonal direction, ma solmen adavan. On deve saltar súper adversari figuras, si li secuent camp es ínoccupat. Li adversari figura es prendet del tabul. Si it es possibil, on deve continuar saltar. Secun quelc regulariums on deve anc retrosaltar, si possibil.

Si un figura attin’e li contrari final vice, it es promoet a un dame. On indica to, mettente un duesim figura sur it. Un tal dame posse ear in omni diagonal directiones, secun quelc regulariums mem un ínlimitat númere de campes. Ma in omni casu un dame deve atterrar rectmen pos un salta super un adversari figura.

Ante li comensa del lude, omni lusor distribue su figuras sur li unesim tri (8×8-tabul) o li unesim quar (10×10-tabul) vices. Li lusor con li nigri figuras comensa.

Li scope del lude es li ínmobilisation del adversari figuras.

Dame orígina supposibilmen in li annus 900 o 1000 in li sud de Francia. On usat li tabul de chac. Li regules es un adaption del lude alquerque.

Li unesim dame por computer ha esset programmat 1952 de Arthur L. Samuel, un explorator che IBM. It ha esset un del unesim lusori programmas por computeres. 2007 Jonathan Schaeffers e su collaboratores demonstrat, qualmen ili ha soluet li lude de dame per lor programma Chinook: Un perfect lude de ambi lusores conducte sempre a un patta.