Vasilica Viorica Dăncilă (* 16. decembra 1963 w Roșiori de Vede) je rumunska politikarka Socialdemokratiskeje strony (Partidul Social Democrat; PSD), kotraž bě wot 29. januara 2018 hač do 4. nowembra 2019 ministerska prezidentka Rumunskeje.

Wona studowaše wot 1983 do 1988 w Ploiești inženjerstwo z ćežišćom na wudobywanju zemskeho wolija a dźěłaše potom najprjedy jako inženjerka a potom jako docentka při industrijowym gymnaziju we Videle. Wot 2004 do 2006 studowaše w Bukaresće politiske a zarjadniske wědomosće.

Wot lěta 1996 je wona čłonka PSD. Wot 2000 do 2003 bě předsydka žónskeho zwjazka strony we Videle a wot 2003 do 2011 předsydka měšćanskeho zwjazka tutoho města. Wot lěta 2009 bě zapósłanča Europskeho parlamenta.

Po wotstupje premiera Mihai Tudose w januarje 2018 bu wot swojeje strony namjetowana za jeho naslědnicu. Dnja 29. januara bu wot rumunskeho sejma jako prěnja žona do tutoho zastojnstwa wolena.

 Commons: Viorica Dăncilă – Zběrka wobrazow, widejow a awdiodatajow

• Zapisk w datowej bance Europskeho parlamenta