Jurij Šołta (1888)
Jurij Šołta (němsce Georg Scholze; * 4. januara 1888 we Wotrowje, † 28. julija 1968 w Drježdźanach) bě serbski překupski zarjadnik, słownikar a dr. phil.
Narodźi so jako syn Wotrowskeho klamarja Mikławša Šołty a bě młódši bratr Bena Pětra a Pawoła Šołćic. Wukubłany překupski zarjadnik bě wot 1925 do 1934 zarjadnik Janskich kupjelow w Smječkecach a wot 1934 do 1937 přistajeny we wobchadnistwje a wjednistwje ćišćernje Towarstwa swj. Cyrila a Metoda w Budyšinje. Wot 1938 do 1958 bě přistajeny w Komorje za industriju a rjemjesło w Drježdźanach.
W lěće 1938 poradźi so Šołće hišće po zakazu serbskeho pismowstwa přez nacionalsocialistow, wudawać protyku Krajan, přichodny lětnik 1939 bu pak doćišćany skonficěrowany, kaž wopisa Šołta w nastawku Zrudne dopomnjenki (KP 1963). Po Druhej swětowej wójnje je jako eksterny sobudźěłaćer Instituta za serbski ludospyt ekscerpciju serbskeje literatury do słowneje kartaje za słownik serbskeje přitomnostneje rěče přinošował.
Jurij Šołta bě wot 1915 z čłonom Maćicy Serbskeje.
Žórło
[wobdźěłać | žórłowy tekst wobdźěłać]- Jurij Młynk: Šołta, Jurij [2]. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 552
Text is available under the CC BY-SA 4.0 license; additional terms may apply.
Images, videos and audio are available under their respective licenses.
