Awgust Lapštich (tež Gusta Lapsk, němsce August Lapstich; * 1. měrca 1883 w Bukojnje, † 31. oktobra 1962 w Stróži) bě serbski ratar, wjesnjanosta, braška a ludowy basnik.

Narodźi so jako syn žiwnosćerja w serbskej holanskej wjesce Bukojnje pola Wulkich Zdźarow a wopytowaše Zdźarowsku ludowu šulu. Po prěnjej swětowej wójnje bě wjesnjanosta swojeje ródneje wsy, doniž so gmejny dla wotbagrowanja w lěće 1931 njerozpušći. 1926 kupi sej žiwnosć w bliskej Stróži a přesydli so tam.

Lapštich angažowaše so w towarstwowym hibanju Zdźarowskeje wokoliny a słušeše w lěće 1912 k załožerjam tamnišeho serbskeho towarstwa. Dopisowaše mjeńše přinoški do Serbskich Nowin a wozjewješe wjele składnostnych kwasnych pěsnjow. Za čas nacionalsocializma bě dowěrnik Domowiny a po 1945 so wot sowjetskeje komandantury jako prěni powójnski wjesnjanosta Stróže zasadźi.

Jako braška spušći – po zdaću tež dla postupowaceho přeněmčenja kónčiny w běhu industrializacije – wšelake bytostne elementy regionalneho kwasneho wašnja, štož wužadaše protest Jurja Muchi, kotryž so polemisce z nim rozestaješe.

Lapštich bu 1962 na Rakečanskim kěrchowje pochowany.

• Serbska wjes Bukojna zašła. W SN 90, čo. 54, 5. měrca 1931 [přiłoha]

• Jan Cyž: Za wšědnym chlěbom. Žiwjenski wobraz serbskeho holana. Berlin 1957, str. 50–56.
• Nekrolog. W: Pomhaj Bóh 1/1963.
• Siegmund Musiat: Porträts sorbischer Hochzeitsbitter von der Mitte des 19. Jahrhunderts bis zur Gegenwart. W: Lětopis C 22 (1979), str. 24–26.

• Jan Cyž: Lapštich, Awgust. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 331sl