Alfred Mitaš
Alfred Mitaš (němsce Alfred Mittasch; * 24. meje 1890 w Budyšinje, † 5. februara 1956 runje tam) bě serbski wučer a słownikar.
Narodźi so jako syn małeho překupca w Budyšinje a wopytowaše po gymnaziju wot 1906 do 1912 Krajnostawski wučerski seminar. Wot 1912 do 1916 bě z pomocnym wučerjom w Pausnitzu a wot 1916 do 1918 wojak w Prěnjej swětowej wójnje. Wot 1918 skutkowaše jako wučer w ródnym Budyšinje.
Po kóncu Druheje swětoweje wójny dźěłaše Mitaš wot 1947 do 1951 jako přistajeny Domowiny a natwari tam wotrjad „Němsce rěčacy Serbja“. Zdobom bě wot 1948 do 1951 z redaktorom němskeje přiłohi Noweje doby. Wot 1951 hač do swojeje smjerće w lěće 1956 bě ze sobudźěłaćerjom Instituta za serbski ludospyt. Jeho row na Budyskim Hrodźišku njeje wobchowany.
Mitaš napisa a wobdźěła kapsne słowniki serbšćiny. Jeho Němsko-hornjoserbsko-delnjoserbski rozmołwnik zawostaji w rukopisu.
Wozjewjenja
[wobdźěłać | žórłowy tekst wobdźěłać]- 10 000 Worte Deutsch-Sorbisch. Bautzen 1950, 1953
- 10 000 słowow serbsko-němski. Budyšin 1952
Žórło
[wobdźěłać | žórłowy tekst wobdźěłać]- Frido Michałk: Mitaš, Alfred. W: Jan Šołta, Pětr Kunze, Franc Šěn (wud.): Nowy biografiski słownik k stawiznam a kulturje Serbow. Ludowe nakładnistwo Domowina, Budyšin 1984, str. 380
Text is available under the CC BY-SA 4.0 license; additional terms may apply.
Images, videos and audio are available under their respective licenses.
