O Ferrado
Tipo	colectivo
Ideoloxía	Galeguismo, Nacionalismo Galego
Campo de traballo	Historia, sociolingüística, antropoloxía, ciencia política, relacións internacionais e ciencias naturais.
Área de operación	Ensaio, audiovisual e opinión académica.
Data de fundación	8 de marzo de 2022
Fundador(es)	Pablo Diego, Lucía Rodríguez, Miguel Argibay, Luis Lores, Noah Chichester, Julio Nóvoa, Víctor Sánchez.
Na rede
https://oferrado.gal/
[ editar datos en Wikidata ]

O Ferrado é un colectivo galeguista e revista cultural de publicacións periódicas centrado na sociopolítica, historia e economía de Galiza fundado no ano 2022. Os seus traballos abranguen un amplo número de temas tales como a sociolingüística, a antropoloxía, a psicoloxía social, a ciencia política, as relacións internacionais, a demografía, os estudos do territorio, o nacionalismo, o irredentismo e a historia en relación con Galiza e a lingua galega.

O Ferrado fundárono o 8 de marzo de 2022 Pablo Diego (antropólogo gañador coa novela Alén do Premio para a Preservación da Lingua e a Cultura Galega do ano 2021); Lucía Rodríguez (creadora do proxecto de divulgación O Argueiro dos Ancares, dinamizadora do mundo rural e membro fundadora da A.V. Irmandade Naviega, a Asociación Ser e a A.C Rente ao Couce); Julio Nóvoa (mestre do Instituto Galego de Física de Altas Enerxías); Luis Lores (vocalista da banda Fondo Norte); Miguel Argibay (compositor); Noah Chichester (estadounidense divulgador da lingua e da cultura galega. Colaborador do El Correo Gallego e do programa da TVG Dígocho eu); e mais Vítor Sánches (activista en diversos colectivos político culturais). Os seus fundadores, inspirados no manifesto Máis alá! de Manuel Antonio e Álvaro Cebreiro, procuran aglutinar un medio galeguista, con perspectiva nacional, que loite pola dignificación da terra e da lingua galega.^[1]

O Ferrado é un colectivo plural formado por mozos e mozas na propia Terra e tamén na emigración. O seu obxectivo é a manifestación do sentir popular que acredita no propio país. Aspirando a reflectir as distintas visións da nación e a traballar pola súa defensa e o seu respecto. O Ferrado é un proxecto presente do estudo e difusión do pasado, e tamén a representación contemporánea da visión do pobo por parte das novas xeracións. Recollendo a testemuña das vangardas históricas que xurdiron para a dignificación, a posta en valor e a reivindicación da identidade galega.^[2]

Como espazo de análise crítica de temas de actualidade para a sociedade galega do século XXI, O Ferrado ven de tratar problemáticas tales como o impacto do turismo en Galiza, as dificultades da vida no medio rural ou as constantes vagas de incendios, cunha constante perspectiva de xénero. Da mesma maneira, centra parte dos seus esforzos na lingua galega desde múltiplos puntos de vista: o sociolingüístico (neofalantismo, prexuízos sociais, etc.), o cultural (rexeneración de toponimia), e o político-estratéxico, mantendo colaboracións coa Juventude Unida dos Países de Língua Portuguesa (JUPLP).

O Ferrado emprega con asiduidade nos seus artigos tres variantes da lingua galega: Galego normativizado: Instituto da Lingua Galega (ILG) e Real Academia Galega (RAG); Galego Internacional: Segundo a normativa da Associaçom Galega da Língua (AGAL), así como de acordo coa normativa da Associaçom de Estudos Galegos (AEG). E, finalmente, a variante dialectal naviega.

• "A medida do ferrado é diversa, como o país mesmo". Galicia Confidencial. Consultado o 7 de abril de 2022. 
• "Vinte destaques de 2022. Os acontecementos culturais que fixeron avanzar o (noso) mundo este ano". Vinte. Consultado o 20 de decembro de 2022. 
• "O Ferrado: a revista online de sete mozos que queren dar voz a toda unha xeración". La Voz de Galicia. Consultado o 5 de decembro de 2023.