Para outros artigos de entidades numismáticas coa palabra "gabinete", véxanse as páxinas de homónimos Gabinete, e Gabinete de Medallas e Gabinete numismático.

Gabinete de Numismática (Museo da Cidade)
Palacete Viscondes Balsemao, sede do Gabinete de Numismática
Coordenadas	Coordenadas: 41°8′56.731″N 8°36′55.040″O / 41.14909194, -8.61528889
País	Portugal
Cidade	Porto
Inauguración	1852 No Museo Municipal do Porto. 1942 No Museo Nacional Soares dos Reis. 1988 Na Casa Tanit. 2008 Na configuración actual.
[ editar datos en Wikidata ]
v c e

O Gabinete de Numismática é un dos núcleos museolóxicos que constitúen o chamado Museo da Cidade do Porto, que conta cunha das maiores coleccións de numismática de Portugal, centrada sinaladamente na moeda grega, romana, visigoda, dos reinos cristiáns, árabe e portuguesa.^[1][2]

O Museu da Cidade é a designación dada a un conxunto de núcleos museolóxicos espallados pola cidade do Porto. Ademais do Gabinete de Numismática, os restantes núcleos son o sitio arqueolóxico da Rúa D. Hugo, a Casa do Infante (Torre Norte), o Museo do Viño do Porto e o Museo Romántico da Quinta da Macieirinha.^[3][4]

Está instalado no Palacete dos Viscondes de Balsemão (século XVIII), no número 71 da praza de Carlos Alberto, na Baixa do Porto (metro: Trindade).^[5][6]

A colección iniciouse en 1850, coa adquisición da colección particular de João Allen (1781-1848) polo municipio para a constitución do Museo Municipal do Porto, inaugurado en 1852 na rúa da Restauração.^[7]

Non foi ata 1937 cando se iniciou o proceso de inventariado da colección, que posteriormente foi trasladada ao Palacio dos Carrancas, da mesma cidade, onde foi inaugurado o Museo Nacional de Soares dos Reis, en 1942.

Naquela nova localización permaneceu a colección ata o seu traslado ás instalacións da coñecida como CasaTait (ou Quinta do Meio), na freguesía de Massarelos, en decembro de 1988.

Desde setembro de 2008 o Gabinete de Numismática foi trasladado para as súas instalacións actuais do Palacete dos Visconde, na praza de Carlos Alberto, onde se albergan as moedas, medallas, condecoracións, cuños e matrices de papel moeda, con series que abranguen toda a historia da numismática, desde as orixes da moeda ata a actualidade, pasando por exemplares de procedencia grega, romana, sueva, visigoda ou árabe.^[8]

A entrada ao museo é gratuíta e en 2009 o número de visitantes foi de 1131.^[9] O horario habitual de apertura é de luns a venres de 9:00 a 19:30 horas, e os sábados de 10:00 a 12:00 e de 15:00 a 19:00 (entre abril e outubro), e de 10:00 a 12:00 e de 13:00 a 17:30 (de novembro a marzo); pecha os domingos e festivos.^[10]

O 1 de febreiro de 2018 emprendéronse unhas obras de mantemento e reacondicionamento das instalacións que provocaron o pechamento temporal do museo.^[11]

Wikimedia Commons ten máis contidos multimedia na categoría:  Gabinete de Numismática

• Gilabert González, L. M. La Gestión de Museos: Análisis de las políticas museísticas de la Península Ibérica. Tese de doputoramento. Universidade de Murcia. 2001.
• Gilabert González, L. M. "Museos, gestión y patrimonio cultural: El proyecto de la ciudad de Oporto". En PASOS. Revista de Turismo y Patrimonio Cultural. Vol. 13. Nº 1. 2015. Páxinas 93-112.
• Pereira, Isabel. "O desenvolvimento da ciência numismática na contemporanidade: técnicas de apresentação e projectos de investigação Arquivado 07 de novembro de 2018 en Wayback Machine.". En Actas de la VIII reunión del Comité Internacional de Museos Monetarios y Bancarios (ICOMON). Barcelona, 2001. Museu Nacional d'Art de Catalunya. Barcelona. 2003. Páxina 12.

• Lista de museos numismáticos

• Sitio do Gabinete de Numismática na web da Cámara Municipal do PortoArquivado 07 de novembro de 2018 en Wayback Machine.
• Perfil en Facebook do Gabinete de Numismática^{[Ligazón morta]}
• Vídeo sobre o Gabinete de Numismática. Área Metropolitana do Porto