As torres da Cidade da Cultura son un proxecto do singular arquitecto John Hejduk que se remonta ao ano 1992, e que estaban pensadas para ser situadas no Parque de Belvís, onde albergarían actividades pedagóxicas complementarias ao xardín, funcionado como torres botánicas. O proxecto non chegou a materializarse e, trala morte do arquitecto no ano 2002, o responsable do proxecto da Cidade da Cultura, Peter Eisenman, decidiu incluílas na súa obra, en homenaxe ao desaparecido autor. As torres, xa construídas, intégranse por tanto no complexo da Cidade da Cultura, aínda en construción, asumindo funcións de recepción, información e exposición. Están situadas cara ao sur, moi preto da biblioteca e do futuro parque forestal que inclúe o proxecto. Son dúas pezas escultóricas iguais en forma, de singular volumetría: un prisma que ascende ata os 20 m de altura e que vai perdendo sección a medida que crece, ata converterse en algo parecido a un lucernario. Aínda que en forma son iguais están revestidas de diferente maneira: sobre unha estrutura metálica que lles da forma, unha delas revístese exteriormente con pedra mentres que a outra o fai en vidro.