Bellvitge

Localización
41°21′03″N 2°06′39″L / 41.3508, 2.1108Coordenadas: 41°21′03″N 2°06′39″L / 41.3508, 2.1108
Estado	España
Comunidade autónoma	Cataluña
Provincia	provincia de Barcelona
Ámbito funcional territorial	Ámbito metropolitano de Barcelona
Comarca	Barcelonès
Concello	L'Hospitalet de Llobregat

Bellvitge é un barrio da cidade de L'Hospitalet de Llobregat, na provincia de Barcelona, que forma parte do Distrito VI xunto co limítrofe barrio de El Gornal.

Atópase a unha altitude de entre 4 e 8 metros sobre o nivel do mar. Limita polo oeste cos concellos de Cornellà de Llobregat e El Prat de Llobregat, polo sur co de Barcelona, polo leste cos barrios de El Gornal e Granvia L'H e polo norte co barrio do Centre. O seu territorio forma parte do Delta do Llobregat e considérase que a súa formación é bastante recente, do século X, aínda que no lugar houbo zonas húmidas durante moito tempo. Por iso aparece documentado na época medieval como Banyols. Ata 1920 o territorio de La Marina de L'Hospitalet chegaba ata o mar pero nese ano o concello de Barcelona anexionouse as 900 hectáreas meridionais do termo co argumento da ampliación do porto. Dende entón, o límite do barrio e do concello é unha liña recta, paralela a un tramo de liña férrea do porto, trazada nun despacho.

O territorio que actualmente ocupa o barrio de Bellvitge era unha zona destinada á agricultura, moi produtiva grazas á fertilidade das súas terras. Caracterizábase tamén polos desbordamentos do río Llobregat. O regadío xeneralizouse a partir de 1819, coa inauguración do Canal da Infanta e a construción dunha rede de quenllas que levaban auga a toda a zona esquerda do delta.

Os primeiros indicios de que o lugar estaba habitado remóntanse a finais do século X, cando aparece mencionado o Mas d'Amalvígia, e no século XI, época na que se construíu a ermida de Bellvitge, situada uns 2 km ao sur do lugar onde séculos máis tarde xurdiu a pequena vila de L'Hospitalet, hoxe núcleo antigo da cidade.

En 1964 iniciouse a construción dun polígono de vivendas e os primeiros bloques comezaron a ocuparse no verán de 1965. En 1975 xa rematara a construción da maioría deles e a poboación era de 30.659 habitantes. En 1986 acadouse o máximo demográfico, con 32.832 habitantes, cifra que foi baixando dende entón suavemente como no resto de barrios de L'Hospitalet. A diferenza doutros barrios, dende o ano 2000 practicamente non recibiu inmigración estranxeira. Segundo datos do concello, en 2012 tiña 25.528 habitantes censados.

Bellvitge é un barrio que ao estar situado á entrada de Barcelona, e despois de moitos anos de loitas veciñais, benefíciase actualmente dunha boa comunicación tanto co resto de L'Hospitalet como coas localidades lindeiras que conforman a área metropolitana.

Fundamentalmente dispón de dúas estacións de metro: Bellvitge e Hospital de Bellvitge, da liña 1. Ademais dispón dunha estación das liñas 2 e 10 de Proximidades Barcelona de Renfe Operadora, así como diversas liñas de autobuses urbanos, tanto diúrnos como nocturnos.

Wikimedia Commons ten máis contidos multimedia na categoría:  Bellvitge

v c e Distritos e barrios de L'Hospitalet de Llobregat
Distrito I	Centre Sant Josep Sanfeliu
Distrito II	Collblanc La Torrassa
Distrito III	Santa Eulàlia
Distrito IV	La Florida Les Planes
Distrito V	Can Serra Pubilla Cases
Distrito VI	Bellvitge El Gornal
Distrito económico	Granvia L'H