Søren Malling
akteur
persoanlike bysûnderheden
echte namme	Søren Dyrberg Malling
nasjonaliteit	Deensk
berne	3 febrewaris 1964
berteplak	Kjellerup (Denemark)
etnisiteit	Deensk
reg. identiteit	Jutsk
jierren aktyf	1992 – no
prizen	Lauritzen Award 2013
offisjele webside
gjint

Søren Malling (folút: Søren Dyrberg Malling; Kjellerup, 3 febrewaris 1964) is in Deensk akteur.

Malling waard yn 1964 berne yn it doarp Kjellerup, yn sintraal Jutlân. Hy folge in oplieding ta akteur oan 'e Skuespillerskolen yn Odense, dêr't er yn 1992 ôfstudearre.

Malling begûn syn karriêre as akteur op it toaniel. Fan 1997 ôf spile er yn in grut tal Deenske tillefyzjesearjes en fan 1998 ôf wied er ek te sjen yn in soad Deenske films. Hy briek yn syn heitelân yn 2007 troch mei syn rol as resjersjeur Jan Meyer yn 'e tillefyzjeskriller Forbrydelsen. Yn 2009 wurke er as stimakteur mei oan 'e tekenfilm Æblet & Ormen.

Ynternasjonaal rekke Malling bekend doe't er yn 2010 de rol fan Torben Friis fertolke yn 'e hitsearje Borgen. Yn 2013 ûntfong er de Lauritzen Award, in wichtige Deenske filmpriis. Yn 2014 rispe er mei de haadrol yn 'e searje 1864 sawol nasjonaal as ynternasjonaal in protte lof. Yn 2018 fertolke Malling de rol fan 'e (legindaryske) Deenske kening Wiglek yn 'e Nederlânske histoaryske aventoerefilm Redbad, fan regisseur Roel Reiné, oer Redbad, de achtste-iuwske kening fan 'e Friezen.

Malling is yn syn frije tiid in fanatyk tennisser. Hy is troud mei aktrise Petrine Agger, dy't yn Forbrydelsen de frou fan syn eigen personaazje spile. Ek yn Borgen wurken Malling en de frou gear.

• (in) Folsleine filmografy fan Søren Malling yn 'e Internet Movie Database (IMDb)

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons  Ofbylden dy't by dit ûnderwerp hearre, binne te finen yn de kategory Søren Malling fan Wikimedia Commons.