M personaazje út 'e James Bond-searje
Akteur Bernard Lee spile M yn 'e earste alve James Bond-films.
persoanlike bysûnderheden
oare namme(n)	ferskaat
bynamme	M
sekse	ferskaat
soarte personaazje	minske
nasjonaliteit	Britsk
berop/amt	haad fan MI6
oare ynformaasje
besibbe   personaazjes	James Bond Miss Moneypenny Q Felix Leiter
geastlike heit	Ian Fleming
útjouwer	Jonathan Cape
ûntstean	1953

M is de koadenamme fan it haad fan 'e Britske ynljochtingetsjinst MI6 yn 'e James Bond-romans fan Ian Fleming en de dêrop basearre James Bond-filmsearje. De oantsjutting is net persoanspesifyk, mar giet fan persoan nei persoan oer mei de funksje. Fleming yntrodusearre it personaazje yn 1953, yn syn earste Bond-roman Casino Royale. In oar bekend personaazje út 'e Bond-romans en -films is Miss Moneypenny, de sekretaresse fan M.

Fleming basearre de M út syn boeken foar it meastepart op skout-by-nacht John Henry Godfrey, de sjef fan 'e Britske Marine Ynljochtingedifyzje, ûnder wa't Fleming yn 'e Twadde Wrâldoarloch tsjinne. Oare mooglike boarnen fan ynspiraasje foar it personaazje wiene sir Claude Dansey, it plakferfangend haad fan 'e Britske bûtenlânske ynljochtingetsjinst MI6; Maxwell Knight, it haad fan 'e Britske binnenlânske ynljochtingetsjinst MI5 (dy't syn memo's ûndertekene mei "M"); en William Melville, in Ier dy't opklom ta sjef fan it Secret Service Bureau, de foarrinner fan sawol MI6 as MI5.

De rol fan M is yn 'e James Bond-films fertolke troch ferskate akteurs. Bernard Lee, dy't de rol spile yn 'e earste alve films, waard der op in stuit suver mei identifisearre. Yn 'e filmsearje fan Eon Productions ûntbrekt it personaazje M inkeld yn For Your Eyes Only (1981). Dy film waard opnommen koart nei't Lee ferstoarn wie. Dame Judi Dench wie yn 1995 de earste froulike M.