Il kelvin (simbul: K) e je la unitât di temperadure dal Sisteme Internazionâl.

Al è definît in base a doi fatôrs:

1. Zero kelvin a corispuindin al zero assolût, che e je la temperadure minime che si pues vê, intun stât di mancjance totâl di moviment a nivel molecolâr. Cheste temperadure e corispuint a -273,15 grâts Celsius, e a -459,67 grâts Fahrenheit
2. Un kelvin al corispuint a 1/273,16 de temperadure termodinamiche dal pont tripli de aghe. Une difarence di un kelvin e je ecuivalente a chê di un grât centigradi. Al dì di vuê, la scjale Celsius e je definide a partî dal kelvin

Cheste unitât si clame kelvin (o K) in onôr di William Thomson, che al cjapà il non di Lord Kelvin. Il non just di cheste unitât al è kelvin (cun la prime letare minuscole), e no grât Kelvin o °K come ogni tant si viôt scrit par analogjie cul grât Celsius.