Un mapa es una representación gráfica simprifica dun territoriu con propiedais métricas sobri una superfici bidimensional que puei sel prana, esférica o inclusu poliéirica. Las propiedais métricas del mapa dependin dela proyeción gasta, i posibilitan la toma de meyias de destancias, ángulus o superficis sobri él i su relación con la realida, en argunus casus apricandu coeficientis conocius pa la correción delas meyias.

Iniciaus con el propósitu de conocel el mundu i apoyaus primeramenti sobri teorías filosóficas, los mapas constituyin oi una huenti emportanti de enhormación i una gran parti dela ativida umana está relaciona duna u otra horma con la cartografía.

Ogañu se sigui teniendu la enquietú i la necesida de proseguil con la nunca acaba lavol cartográfica. El univelsu en general i el sistema solal en particulal ufrecerá sin dua nuevus terrenus pa esta lavol que tien orígenis enmemorialis.

El gastu delas ténicas basas ena ortofotografía hizu posibli no solu conocel el contornu craru dun país, dun continenti, o del mundu, sinu tamién aspetus etenográficus, estóricus, estadísticus, idrográficus, orográficus, geomorfológicus, geológicus, i económicus que llevan al ombri a un conocimientu más ampriu de el su meyiu, del praneta nel que vivi.

La estória dela cartografía abarca endi los primerus traçus ena arena o nievi, hata el gastu de ténicas geodésicas, fotogramétricas i de fotoenterpretación. Los erroris geométricus dun mapa suelin mantenelsi pol debaju delo que el oju umanu puei precibil, i es habitual cifral el límiti dela precepción visual umana en 0.2 mm.

La qüestión esencial ena elaboración dun mapa es que la espresión gráfica ebi sel crara sin sacrifical pol ellu la esatitú. El mapa es un documentu que tien que sel entendiu sigún los propósitus que entervinierun ena su preparación. Tou mapa tien un ordin jerárquicu de valoris, i los primarius ebin destacalsi pol encima delos segundarius.

Pa poel cumplil con estas exigencias, el cartógrafu puei crial varius «pranus de letura». En tou momentu se ebin tenel presentis las ténicas de simprificación, a basi de coloris o simbología, sin perdel de vista que en un pranu de letura más prohunda se puein obtenel elementus enhormativus detallaus. La cantida de enhormación ebi estal relaciona en horma propolcional a la escala. Quantu mayol sea el espaciu deicau a una región, mayol será tamién el númiru de elementus enhormativus que se puean aportal acerca de ellus.

En definitiva, tou mapa tien que incluil una síntesis de conhuntu al igual que un detalli analíticu que premita una letura más prohunda. El nivel en que se cumplan estas condicionis, será igualmenti el nivel de calida cartográfica dun determinau mapa.