Enterobirus
Irudi gehiago
Sailkapen zientifikoa
Erreinua	Orthornavirae
Filuma	Pisuviricota
Klasea	Pisoniviricetes
Ordena	Picornavirales
Familia	Picornaviridae
Generoa	Enterovirus [[|]]

Enterobirusak (grezieratik: ἔντερον, "hestea") Pikornabirus familiako genero bat da. Birus hauek giza patogenoak dira eta gorputzeko hainbat ataletan (ez soilik hesteetan) infekzioak sortzen dituzte. Gehienak azido-erresistenteak dira, eta horregatik urdaileko pH azidoak ez ditu deuseztatzen.

Duela gutxi arte lau taldetan sailkatzen ziren: poliobirusak, A Coxsackie birusak, B Coxsackie birusak eta ekobirusak. Gaur egun, aldiz, identifikatzen diren enterobirus berriak ondoz ondoko zenbaki sistema batekin izendatzen dira: EV68, EV69, EV70... ^[1]

Infekzioa sortzen dutenean, enterobirusek kutsatutako pertsona baten arnas-jariaketan (listuan, sudur-mukietan...) eta gorozkietan daude. Hortik beste pertsona bat infekta dezakete, bigarren horrek jariakin horiekin kontaktua egiten badu. Birusen transmisio bideak, beraz, gorozki-ahoa eta arnas bidea dira ^[2].

Enterobirus guztiek harizpi bakarreko RNA dute, polaritate positibokoa. RNA horrek 7500 base ditu, eta mutazio asko pairatzen ditu, errekonbinazio tasa handia duelako.

Poliobirusek tropismo murriztua dute, eta zelula batzuetako errezeptoreak besterik ez dituzte ezagutzen (hezur-muinekoak, neurona batzuetakoak, muskulu eskeletikokoak...). Coxsackie birusek eta Ekobirusek ezagutzen dituzten errezeptoreak zelula eta ehun mota askotan daude, horregatik gaixotasun mota gehiago eragin dezakete ^[3].

Umeak dira sentikorrenak enterobirusek sortutako infekzioak harrapatzeko. Ugariak dira infekzio horiek eragiten dituzten gaitzak: arnas-aparatuko infekzio arinak, aho-esku-oin gaixotasuna, meningitisa, miokarditisa, konjuntibitis hemorragikoa, poliomielitisa, entzefalitisa....Infekzio asko ere asintomatikoak dira ^[4]