La Vera Evgen'evna Duševina (Mósca, 6 'd Utóbar dal 1986, ciamàda in Rus Вера Евгеньевна Душевина) l'è na tenìsta rusa prufesiunìsta da 'l 2003. L'è élta 180 cm e la péśa 73 chilo. La dróa al bras dèstar e la tira 'l arvèrs a dū maṅ.

In dla sò caréra l'è rivàda a èsar la nùmar trént'òṅ dal mónd al 4 ad Luj dal 2005 e l'à purtâ a cà un tìtul WTA e òṅ ad qvéi d'l ITF. In di turnèo dal Gran Slam l'è rivàda in di utàṿ in dal 2005 a gl'Australian Open.

In dópi l'à śugâ sèt finàli, sèmpar cun dal cumpàgni difarénti, ma l'à vins un tìtul sōl in dla prima ucaśiòṅ a Varsàvia insém a la Tetjana Perebyjnis. In dal 2005 l'è stada bòna ad rivàr in di quàrt a Wimbledon.

La rusa la riva par la prima vòlta in na finàl 'd un turnèo WTA in dal Śugn dal 2005 in sl'èrba 'd Eastbourne ma la la pèrd par 5-7 0-6 cun la Kim Clijsters. Par dū vòlti in Istâ la riva a śugàr-'s al tìtul ad Stucólma, in dal 2007 e in dal 2008, ma la n gh la cava mai a purtàr-'l a cà, pardénd prima cun l'Agnieszka Radwańska 1-6 1-6 e pò anc cun la Caroline Wozniacki 0-6 2-6.

Finalmènt la pōl tiràr fóra al spumànt da 'l giàs e tiràr via al turàć al 2 'd Agóst dal 2009 quànd la bat in finàl la céca Lucie Hradecká par 6-0 6-1, vinsénd acsè al sò prim tìtul WTA.

• (EN) La sò schéda in sal sit dla WTA