Occhi senza volto
Miranduléś|
C'l artìcul chè 'l è scrit in
Miranduléś |
 Les yeux sans visage
| ||
| Occhi senza volto | ||
 L'Edith Scob e l'Alida Valli in na figùra dal film | ||
| Òć sénsa ghigna 1960 | ||
|---|---|---|
| Regìa: Georges Franju | ||
| Scritōr: Pierre Boileau • Thomas Narcejac Jean Redon • Claude Sautet | ||
| Atōr: Alida Valli • Edith Scob • Pierre Brasseur Juliette Mayniel • François Guérin • René Génin Béatrice Altariba • Yvette Etiévant • Marcel Pérès | ||
| Müsica: Maurice Jarre | ||
| Léngua: Francéś | ||
| Dürä dal film: 95 minüt | ||
| Nasiōṅ: Frància • Itàglia | ||
Occhi senza volto (Òć sénsa ghigna) 'l è 'n film dramàtic e ad scarésa dal 1960 ad Georges Franju trat da 'n rumànś ad Jean Redon. 'L è stâ girâ in biànc e négar.
In alóra, quànd 'l è vgnû fóra, al gh'à abû tut cóntar tant che 'l ùnic crìtic ch'al 'n iva dascōrs bèṅ 'l iva pò pardû 'l pòst. Quànd 'l è stâ preśentâ a 'l Fèstival 'd Edinbûrg sèt parsòni i gh'aṅ abû di śmanvèṅ e tut i gh dàv'n adòs tant ch'al regìsta 'l à pò dit che finalmènt al capìva parchè i scuséś i pòrt'n i stanlèṅ.
Sunt
Al prufesōr Génessier (Pierre Brasseur) 'l è 'n luminàri in dal camp di trapiànt di tesû umàṅ e al s impratichìs su i caṅ. Finìda na cunferénsa su c'l argumènt lè al và in présia a 'l ubitòri p'r arcgnósar se na ragàsa catàda mòrta in dla Séna l'è sò fiōla Christiane (Edith Scob), na śōvna dasfurtunàda ch'l'éra armàśa uféśa in fàcia soquànt tèmp prima in 'n incidènt in màchina, o la fiōla 'd Emile Tessot (René Génin), tuti e dū sparìdi in cal méntar.
Al dutōr 'l arcgnós in dla vitma sò fiōla e a vèṅ fat al funeràł. Insém a Génessier a gh'è 'l dutōr Jacques Vernon (François Guérin), ch'al lavóra in dla sò clìnica e ch'l éra anc al muróś dla Christiane, e la Louise (Alida Valli), la sò asistènta. Chi lē l'è stada qvéla ch'l'iva butâ 'l cadàv'r in dal fiùm ma a n s tratàva minga dal còrp sénsa vita dla Christiane ma 'd qvél dla fiōla dal sgnōr Tessot. Lì lē l'éra mòrta dòp che Génessier al gh'iva cavâ via la pèla dla ghigna par strapiantàr-la in dla fàcia 'd sò fiōla. 'N intervènt dal gènar 'l iva curâ soquànt tèmp prima pròpria la Louise, ch'l'éra turnàda nurmàla a part un castròṅ su 'l còl in dal punt dla tacadùra che lē la lóga sèmpar cun na cadnìna 'd pèrli strica, ma minga la Christiane ch'la gh'à abû 'n infesiòṅ ad rigèt. Par lugàr al sò grugn da scarésa ch'al fà vgnir i śgriśōr sōl a véd'r-al, la ragàsa la pòrt' adòs na mascra biànca.
Sò pàd'r al n gh dà minga a muć e al manda la Louise a catàr dgl'atri śōvni cumpàgni a sò fiōla, cuma la śvisra Edna Grüber (Juliette Mayniel) ch'la stùdia a Parì e ch'l'è drē a pascàr in du star. Anc a chi lē a gh vèṅ tiràda via la pèl c'n un bìsturi e a 'l inìsi a pâr ch'a sia andâ tut bèṅ cun la Christiane ma tèmp dū stmani ch'a marsìs incòsa.
La Christiane la gh'à 'l magòṅ e la próa a telefunàr a 'l sò muróś par sintìr incóra la sò vóś ma pò a gh scapa 'd dir-'n al nóm. Jacques 'l è persuàś 'd avér arcgnusû pròpria la vóś dla sò amàda e 'l è sicûr dònca ch'la Christiane la sia viva. Esénd ch'na testimòni amìga dl'Edna l'iva vdû na dóna cun na culàna 'd pèrli strica dar-'g un pasàǵ in màchina, Jacques al taca a 'vér di suspèt su 'l prufesōr Génessier. La pulisìa la dmanda a na ragasōla cun di prubléma cun la giustìsia, la ladra Paulette (Béatrice Altariba), ad jutàr-i andànd a far-as curàr in dla sò clìnica.
Culegamènt estéran
Text is available under the CC BY-SA 4.0 license; additional terms may apply.
Images, videos and audio are available under their respective licenses.
