Beatriz Haddad Maia
Miranduléś|
C'l artìcul chè 'l è scrit in
Miranduléś |
La Beatriz Haddad Maia (San Pàulo, 30 ad Maǵ dal 1996) l'è na tenìsta braśigliàna prufesiunìsta da 'l 2010. L'è élta 184 cm e la dróa al bras sinìstar. Al 13 'd Avrìl dal 2015 l'è rivàda a èsar la nùmar sènt-nuànta dal mónd.
In dla sò caréra l'à vins quàtar tìtui ITF.
Caréra
L’Haddad Maia la śōga 'l sò prim incóntar in dal sircùit ITF in dal 2010 a quatórd'ś an e un dè. 'L an dòp la riva subìt in finàł in d'l ITF da déś-mila dòlar ad cà ad San Pàulo pò in Utóbar la vins qvél ad Goiania. Fra 'l 2012 e 'l 2013 la in vins àtar tri e a riva anc la sò prima vìnsida in dal sircùit WTA a Flurianòpulis. La sèra 'l an in dal primi tarśènt dal mónd.
In dal 2014 la tōś part a i turnèo ad cà ad Flurianòpulis e ad Rio de Janeiro par via ad dū carti salvàdghi ma la và fóra subìt. 'L an al taca mâł par lē, sōl da Śugn in avànti la s fà valēr in Ulànda, a Bréda, in dua la riva in finàł pardénd par 1-6 6-7 da la Bernarda Pera, e a Middelbûrg, in dua la s férma in semifinàł. In Nuvémbar và a śugàr in di Stat Unî a Captiva Island in 'n ITF ad sinquànta-mila dòlar e là la fà sudàr dimóndi la Petra Martić in di quàrt. La cruàta la gh'à la méj par 1-6 6-1 6-2.
In dal 2015 la riva in di quàrt in dal turnèo WTA ad Rio de Janeiro sćiancànd prima la María Irigoyen par 6-1 6-1 e pò la Polona Hercog par 6-1 6-2. A 'l tèrs tùran la s véd anulàr tri match point da la Sara Errani ch'la pèrd al sò servìsi sinc vòlti in dal secónd sét ma la gh la cava listés a purtàr la braśigliàna a 'l tie-break par pò bàtar-la par bandòṅ in sal puntéǵ ad 3-6 7-6 3-0 par la rumagnōla. La Beatriz pò la n pasa minga 'l qualificasiòṅ a Charleston ma a Bugutà invéci sè e in Culómbia la pasa anc al prim tùran baténd la Maria Herazo González par 6-3 2-6 7-6.
Culegamènt estéran
Text is available under the CC BY-SA 4.0 license; additional terms may apply.
Images, videos and audio are available under their respective licenses.
