Ideoleg a arddelir gan sawl plaid wleidyddol yn Ewrop yw democratiaeth Gristnogol. Gellir ei olrhain i'r cylchlythyr Rerum Novarum a gyhoeddwyd gan y Pab Leo XIII ym 1891, a oedd yn annog Catholigion i ymuno â'r mudiadau democrataidd newydd a dylanwadu arnynt. Roedd yr Eglwys Babyddol yn gwrthwynebu comiwnyddiaeth, anffyddiaeth, anghydraddoldeb materol, ac ymyrraeth gan y wladwriaeth mewn bywyd cymdeithasol a'r teulu. Yn yr 20g, ehangodd aelodaeth y fath bleidiau i groesawu Cristnogion o bob enwad, ac nid Pabyddion yn unig.

Mae democratiaeth Gristnogol yn cyfuno agwedd geidwadol tuag at lywodraeth a pholisïau o blaid cyfiawnder cymdeithasol megis ailddosrannu cyfoeth a darpariaeth les.