U milvu
Milvus milvus
Classificazioni scentifica
Regnu	Animalia
Divisioni	Chordata
Classa	Aves
Ordini	Falconiformes
Famiglia	Accipitridae
Genaru	Milvus
Nomu binuminali
Milvus milvus Linnaeus, 1753

U Milvu (o Filanciu) (Milvus milvus) hè un aceddu chì faci parti di a famiglia di l' Accipitridae. Hè un tipu d'aceddu chì hè cumunu in Auropa.

U dimurfismu sissuali hè guasi inesistenti ind'è u milvu, ma a femina hè appena più chjara cà u masciu. Par taglia (masciu 60 cm, femina 66 cm) è apartura alari (masciu 150 cm, femina 160 cm), supareghja u milvu brunu, incù u quali à spessu si cunfondi. U so piumaghju hè moltu più chjaru cà quiddu di u milvu brunu, da u quali si distingui par a coda russiccia caratteristica è assà furcata. S'eddu hè ussirvatu in bulu, si distingui par via di u so culori russicciu è di a tacca bianchiccia annantu à u latu infiriori di i penni remiganti primarii. Hè un animali chì a so coda mori larga li parmetti d'arià più faciuli.

U capu di u milvu hè grisgiu. U milvu pò campà sin'à 25 anni. Hè longu 60 à 70 cm. U pesu di u milvu masciu varieghja trà 700 è 1000 grammi, è quiddu di a femina varieghja trà 900 è 1300 grammi. U milvu mangna topa, aciartuli, ruspa, ranochji, è mignoculi. S'accoppia à a fini di marzu o à u principiu d'aprili.

U milvu si cunnosci da u buzaiu chì u milvu hè codisfurcatu, inveci u buzaiu t'hà a coda ronda.

U milvu hè un aceddu sulitariu è tarrituriali. Si nutrisci par u più di picculi mammiferi, di rettili, d'anfibii è di mastaruculi. Arieghja à spessu sopra à i campi è pratulini in cerca di nutrimentu, ch'eddu cattura incù i so artigli putenti. U milvu hè munugamu è i coppii custruiscini un grandi nidu in un arburi. A femina diponi di regula 2 à 4 ova, chì sò incubati da i dui parenti. I ghjovani si ni bulani dopu à à l'incirca 6 sittimani.

Sò cunnisciuti dui sottuspezii di milvu:

• Milvus milvus milvus (Linnaeus, 1758)
• Milvus milvus fasciicauda Hartert, 1914, incù un ariali ristrettu à Capu Verdi

Milvus milvus hè prisenti in Corsica.^[1] In Corsica ci si trova a più impurtanta pupulazioni di milvi d'Auropa. Ma hè più piaghjincu cà muntagnolu ed hè raru d'ussirvà lu sopra à 1400 metri. U milvu hè più cumunu in Pumonti ca in Cismonti. Fraquenta piuttostu i rigioni piaghjinchi è a machja bassa. Par quissa, ùn si scontra micca in i furesti di l'interiori di l'isula nè menu in i machjona. A più impurtanta pupulazioni di milvi in Corsica stà in Balagna, par via di a prisenza di u cunigliulu. A pupulazioni di milvi in Corsica pò essa stimata à 300 coppii arrighjunati.

U milvu hè calatu mori in Italia dipoi u principiu di u XXimu seculu. Hè ancu sparitu da certi rigioni d'italia. In 1980, ùn ci firmava più ca circa 150 coppii. In Tuscana in particulari ind'eddu era cumunu, hè sparitu in u sittanta. Furtunatamenti, ci hè statu un programmu di riintruduzzioni di u milvu in Tuscana, elaburatu da l'Associu di l'Amichi di u Parcu Naturali di Corsica^[2]. Hè privistu cusì di prilivà uni pochi di puilacona in Corsica è in Svizzara è di purtà li in Tuscana. Cinqui piulacona di Corsica sò stati turrati à introducia in Tuscana in 2007.

U milvu hè stata classificatu com'è essendu di priaccupazioni minori da l'Unioni internaziunali par a cunsirvazioni di a natura (UICN). Eppuri, a spezia hà cunnisciutu calati in u passatu par via di a parsecuzioni, di l'avvilinamentu è di a distruzzioni di l'ambienti. I sforzi di cunsirvazioni ani cuntribuitu à a stabilisazioni di i pupulazioni, ma a spezia ferma vulnerevuli.

U milvu hè prutettu da a cunvinzioni internaziunali di Washington (CITES) chì intardisci u cummerciu di i spezii di fauna è di flora minacciati di sparizioni.

• 
• 
• 
• 
  Museum specimen

1. ↑ Thibault & Bonaccorsi (1999), Thibault (2006).
2. ↑ Da: I milvi di Corsica in Tuscana.

• J.-C. Thibault & G. Bonaccorsi, The birds of Corsica, British Ornithologists’ Union, Check-list n°17, 1999
• Jean-Claude Thibault, Connaître les oiseaux de Corse - Acelli di Corsica, Ed. Albiana, 2006
• Le milan royal - U milvu (in francesu)
• I milvi di Corsica in Tuscana - Associu di l'Amichi di u Parcu Naturali di Corsica (in francesu

• Lessicu - L'aceddi, Adecec
• Imagini di u milvu (in inglesu) Archiviu 2009-03-05 at the Wayback Machine

• Milvus milvus annantu à Wikimedia Commons.