Cavaddu di Troia
(LA) « Timeo Danaos et dona ferentes » |
(CO) « Temu i Dànai, ancu quand'iddi offrini doni. » |
(Publio Virghjiliu Marone, Eneidi (Libru II, 49); paroli d'ammunimentu di Laocoonte à i Troiani intenti à purtà u cavaddu drentu a cità.) |
![](https://upload.wikimedia.org/wikipedia/commons/thumb/3/33/The_Procession_of_the_Trojan_Horse_in_Troy_by_Giovanni_Domenico_Tiepolo_%28cropped%29.jpg/220px-The_Procession_of_the_Trojan_Horse_in_Troy_by_Giovanni_Domenico_Tiepolo_%28cropped%29.jpg)
U cavaddu di Troia (o Cavallu di Troia) hè una macchina da guerra chì, sicondu a lighjenda, fù imprudata da i grechi par assaltà a cità di Troia. 'Ssu termini hè intrutu in l'usu littarariu, ma ancu in u linguaghju cumunu, par indicà un stratagema incù u quali si pò pinitrà i difesi.
Storia
[mudificà | edità a fonte]![](https://upload.wikimedia.org/wikipedia/commons/thumb/5/51/Mykonos_vase.jpg/220px-Mykonos_vase.jpg)
Dopu à deci anni d'inutuli assediu i Grechi, suvitendu un pianu cuncipitu da Ulissi, finsini di rinuncià à a cunquista di a cità è di vultà à i so probbii sedii, lascendu nantu à a spiaghja un enormu cavaddu di legnu, par calmà i dii è favurizà u viaghju di ritornu in patria. Drintu à u cavaddu erani parò nascosti i più valurosi guerrieri grechi, vidati da Ulissi. I Troiani, felici par u priculu scampatu, trascinàni u cavaddu à l'internu di i mura, nonustanti Laocoonte è a prufitessa Cassandra avissini cunsiddatu d'ùn fà lu micca. Di suttrattu cumparsi un grecu chjamatu Sinone, u quali cunvinsi u rè ch'è u cavaddu era segnu di paci, ed era in veru un rigalu. Di notti, mentri i troiani durmiani, i grechi iscitini da u cavaddu è apritini i porti di a cità à i so propri cumpagni. Quiddi, dopu à essa si nascosti incù i so navi daretu un'isuletta vicina di nomu Tenedo, erani sbarcati dinò nantu à a spiaghja di Troia. Pinitrati in a cità, i grechi colsini di suspresa i troiani, chì funi supraffatti faciuli. Troia fù data dopu à i fiari.
Stu racontu ùn hè micca narratu in l'"Iliadi" d'Omeru (chì si cunchjudi inveci incù u funirali di Ettore, uccisu da Achilli) ed hè solu incidintalamenti citatu in l'altru puema omericu, l' "Udissea". Hè inveci mintuvatu in u sicondu libru di l'"Eneidi" di Virghjiliu: Enea, principi è esiliatu troianu, u riferisci infatti à a righjina di Cartaghjina, Didone, chì l'uspitaia in una di i tappi di u viaghju chì u purtarà finalmenti à sbarcà annantu à i costi di u Laziu, ind'iddu divintarà u ceppu di a genealugia chì avaria fundatu Roma.
I storichi muderni ani fattu l'iputesa ch'è u cavaddu di Troia fussi in rialità un arghjetu d'assediu à forma di cavaddu, cunsidarendu ch'è a so discrizzioni saria dopu stata trasfurmata in u mitu à traversu resuconti urali tramandati da parsoni chì ùn aviani micca assistutu dirittamenti à l'avvinimentu. Pausania, un storicu grecu vicutu in u seculu II d.C. scrissi in u so libru Periegesi di a Grecia ch'è chiunqua ùn cunsidarighja micca u populu troianu incredibulamenti stupidu sà ch'è u cavaddu era una macchina d'assediu.[1]
Omini in u cavaddu
[mudificà | edità a fonte]Sicondu a Piccula Iliadi cuntinia 13 omini. Sicondu Apollodoru inveci ni cuntinia 50[2], par Tzetze 23, mentri in i Posthomerica (versi 641-650) Quintu Smirneo dà u nomu di trenta capi, è dici chì ci ni era ancu monda di più[3]. In a tradizioni ultiriori funi stabiliti à quaranta unu. Eccu l'elencu di i so noma:
- Odisseo (capitanu)
- Acamanti
- Agapenore
- Aiace di Oileo
- Anfimaco
- Anticlo
- Antifate
- Cianippo
- Demofonte
- Diomede
- Echione
- Epeo
- Eumelo
- Eurialo
- Eurimaco
- Euripilo
- Filottete
- Ialmeno
- Idomeneo
- Leonteo
- Macaonu
- Mege
- Menelao
- Menesteo
- Merione
- Neottolemo
- Peneleo
- Podalirio
- Polipete
- Stenelo
- Talpio
- Tersandro
- Teucro
- Toante
- Trasimede
Noti
[mudificà | edità a fonte]- ↑ Libru I, capitulu XXIII, sizzioni 8
- ↑ Pseudo-Apollodoru, Epitome 5.14.
- ↑ Quintu Smirneo, Posthomerica, libru XII, versi 314-335.
Da veda dinò
[mudificà | edità a fonte]- Eneidi
- Udissea
- Iliadi
- Guerra di Troia
- Ulissi
Text is available under the CC BY-SA 4.0 license; additional terms may apply.
Images, videos and audio are available under their respective licenses.