參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

倉山區 Chŏng-săng-kṳ̆
—  區  —
倉山敆福州市其位置
國家	中國
省	福建省
市	福州市

倉山區是中國福建省福州市倛蜀隻區。中洲島對面有藤山（也號𡅏烟臺山），舊底號𡅏「倉山」，是屬倉山區管倛。倉山區這名字也是趁租塊來倛。

倉山區舊底是西方領事館倛地方，有野価番囝來租塊住，故此有野儕西方倛古蹟共教堂。

• 倉山區敆舊底叫做瓜藤山，也號𡅏藤山。遘元朝暝尾，福州府為𡅏加強江防，敆藤山頂峰設烽火臺，為𡅏共中洲炮臺對應，也叫做煙臺山。另外因為山懸頂有天寧寺（天安寺），故此復號𡅏天寧山。遘明朝洪武年間，山北骹開始建鹽倉，故此者地方叫做倉前，藤山也乞叫做倉前山，簡稱倉山，現代區名就是總款來其。^[1][2]

• 1842年中英《南京條約》簽訂以後，福州乞列做「五口通商」之一，倉山區故此變像歷史上有名其領事館地區，國際交易基地共航運中心。趁1844年開始遘1903年，都領有英國、美國、法國、俄羅斯、日本、荷蘭、葡萄牙、西班牙等等17芘國家敆倉山區設點領事館或者代辦處^[3][4]，同時固起敎堂、學校、醫院，固開始發行報刊、設立洋行等等。因為西方經濟共文化其滲透，倉山區遘今旦固保存仂囝英式、哥特式、羅馬旋門式、東歐式共中西結合式其厝，形成倉山區建築特色^[5]。趁2005年左右開始，因為「舊區改造」，嘢価有地方特色其厝乞拆去（譬如講德園），敆社會上造成影響^[6][7][8][9]。

• 倉山區是福州有名其學區，1980年就乞中國國務院批准福州市其文化居住區。區底裡就開始新建共擴大少年宮、文化館、圖書館、科技館等等蜀批文化設施。特別是國家投資敆倉山區西南其30幾家大、中專院校共幹部學校^[10]。

• 倉山區敆福州市區其南部，現刻時包括南臺島全部，介加上閩江上部分沙洲，四面以閩江南、北港分別共鼓樓區、臺江區、晉安區、馬尾區、長樂區、閩侯縣為界，面積大概142平方公里。^[11]

• 閩江流遘淮安分成兩支——北支固是叫做閩江（舊底也叫臺江、白龍江），南支叫做烏龍江。两支敆馬尾介匯合，最後流遘臺灣海峽。倉山區其北邊是閩江，可以看見臺江區，南邊是烏龍江，可以看見閩侯縣。^[12]

• 倉山區底裡有嘢価山坡，譬如講北部有高蓋山、長安山、煙臺等等，东部有黃山、城門山等等。主島南臺島風景真好，故此有「瓊花玉島」其叫法。當年，敆今旦其梅塢、麥頂、塔亭其三岔墿口方圓五公里底裡都是梅林；每年冬季，嘢価儂都敆租塊看梅花。^[13]

倉山區下底有8隻街道共5隻鎮：

• 倉前街道
• 東升街道
• 對湖街道
• 金山街道
• 臨江街道
• 三叉街街道
• 上渡街道
• 下渡街道
• 倉山鎮
• 城門鎮
• 蓋山鎮
• 建新鎮
• 螺洲鎮