Sibiu
![](https://upload.wikimedia.org/wikipedia/commons/thumb/4/45/Sibiu.jpg/220px-Sibiu.jpg)
Sibiu (distaget [si'biw] e roumaneg ; Hermannstadt en alamaneg, Nagyszeben en hungareg) zo ur gêr vras e Roumania. Pennlec'h distrig Sibiu eo ; gant 147 245 a annezidi e 2011 ez eus unan eus kêrioù brasañ Treuzsilvania. Emañ war lez ar stêr Cibin, un adstêr d'an Olt hag a zo e-unan un adstêr d'an Danav.
Diazezet e voe gant alamanegerien en XIIvet kantved ha kêr-benn Saksoned Treuzsilvania e voe betek kreiz an XIXvet kantved. En XXvet kantved e voe roumanekaet tamm-ha-tamm. Hiziv ez a roumanegerien d'ober an darn vrasañ eus an annezidi (ouzhpenn 95 %). Met Klaus Iohannis, hag a zo prezidant Roumania abaoe Kerzu 2014, zo alamaneger ha bet eo maer Sibiu etre 2000 ha 2014.
Yac'h eo armerzh Sibiu, izel a-walc'h eo feur an dilabour e kêr ha dont a ra kalzik embregerezhioù estren d'en em staliañ enni. Un aerborzh etrebroadel zo, gant linennoù kirri-nij war-zu Bukarest, Italia, Aostria hag Alamagn.
Sibiu n'he deus ket gouzañvet re politikerezh kêraozañ mare Ceaușescu ha miret he deus kalz savadurioù kozh. Anvet e oa bet da gêr-benn sevenadurel Europa e 2007, asambles gant Luksembourg, ha kalz labourioù zo bet graet da gaeraat ha da gempenn ar savadurioù-se. Meur a virdi zo, brudet eo ar mirdi livadurioù Brukenthal ha gant se e teu touristed e-leizh da Sibiu.
Kêrioù gevellet
[kemmañ | kemmañ ar vammenn]Gevellet eo Sibiu gant ar c'hêrioù-mañ :
Deventer (Izelvroioù) abaoe 2007
Marburg (Alamagn) abaoe 2005
Landshut (Alamagn) abaoe 2002
Roazhon (Breizh) abaoe 1999
Klagenfurt (Aostria) abaoe 1996
Columbia (SUA) abaoe 1994
Valencia (Venezuela) abaoe 1993
Wirral (Bro-Saoz) abaoe 1994
Bauru (Brazil) abaoe 1995
Mechelen (Belgia) abaoe 1996
Liammoù diavaez
[kemmañ | kemmañ ar vammenn]Text is available under the CC BY-SA 4.0 license; additional terms may apply.
Images, videos and audio are available under their respective licenses.