Gwenneg
Evit implijoù all, gwelet Gwenneg (disheñvelout).
![](https://upload.wikimedia.org/wikipedia/commons/thumb/6/6a/5_French_centimes_1939.jpg/220px-5_French_centimes_1939.jpg)
Ar gwenneg – gwenneien el liester – a oa ur pezh moneiz e metal gwenn a dalveze un ugentvedenn (1/20) eus al lur.
E Bro-C'hall e veze implijet al lur gwechall. El lur gall e oa 20 gwenneg, ha pep gwenneg a oa ennañ daouzek diner. E Bro-Saoz hag e Breizh-Veur dre vras e oa unanennoù moneiz heñvel, al lur sterling, a oa 20 shilling ennañ, ha 12 penny a oa e-barzh pep shilling.
En deroù e talveze al lur kement hag ul lur pouez a arc'hant. Ugent gwenneg a oa ul lur pouez a arc'hant ivez. A-hed ar c'hantvedoù avat eo digresket talvoudegezh ar pezhioù moneiz-se, hag e dibenn an XVIIIvet kantved ne dalveze mui ul lur kement hag un nebeud kantvedoù a-raok, pa voe kemeret e lec'h gant ar franc, da vare an Dispac'h gall.
Daoust ma oa bet degaset ur moneiz nevez gant an Dispac'h o deus dalc'het an dud d'ober gant ar gerioù kozh, "lur" ha "gwenneg". En XIXvet kantved hag e deroù an XXvet kantved e talveze 1 gwenneg kement hag 1/20 eus ar moneiz a oa en implij er Stad C'hall, kement ha 5 kantim eta.
Latin | Galleg | Brezhoneg | Saozneg |
---|---|---|---|
Libra | Livre | Lur | Pound |
Solidus | Sol pe Sou | Gwenneg | Shilling |
Denarius | Denier | Diner | Penny |
Text is available under the CC BY-SA 4.0 license; additional terms may apply.
Images, videos and audio are available under their respective licenses.