Хара (род водарасцей)
Хара ломкая (Chara globularis)
Навуковая класіфікацыя
Дамен:  Эўкарыёты Царства:  Расліны Аддзел:  Харавыя водарасці Клас:  Charophyceae Парадак:  Charales Сямейства:  Харавыя Род:  Хара
Міжнародная навуковая назва
Chara L., 1753
Сістэматыка на Віківідах Выявы на Вікісховішчы ITIS   9421 NCBI   13778 EOL   11583 IPNI   ???

Ха́ра (Chara) — род шматклетачных водарасцей сямества харавых.

Адна- або двухгадовыя расліны. Талом кустваты, членіста-кальчаковы, падзелены на вузлы і міжвузеллі, з карой, радзей без яе, вышынёй ад 20 см да 1 м і больш, з коранепадобнымі рызоідамі, у многіх відаў моцна інкрустваны вапнай. Вузлы складзены з папярочнага слоя клетак. Міжвузеллі — з адной выцягнутай клеткі даўжынёй 5—10 см і больш. Бакавыя парасткі («лісце») па 3—7 у кальчаку, 2—7-членікавыя, з прылісткамі, адыходзяць ад вузлоў і будовай паўтараюць сцябло.

Размнажэнне вегетатыўнае — «укараненнем» бакавых галін талому і клубеньчыкамі, якія ўтвараюцца на рызоідах і паглыбленых у грунт частках сцябла. Полавы працэс — аагамія. Антэрыдыі і аагоніі развіваюцца на лісцевых вузлах (у двухполых відаў часцей парамі, у разнаполых і некаторых двухполых — адзіночна).

Вядома каля 120 відаў, пашыраных у чыстых прэсных і саланаватых вадаёмах рознага тыпу па ўсім зямным шары, акрамя Антарктыды. На Беларусі (у азёрах) адзначаны хара ломкая (Chara globularis), звычайная (Chara vulgaris), грубая (Chara rudis), лямцавая (Chara tomentosa), шурпатая (Chara aspera), шматкалючкавая (Chara polyacantha), ніткападобная (Chara filiformis), супраціўная, шчаціністая (Chara hispida), дробнашыпаватая (Chara aculeolata) і клубняносная (Chara fragifera).

• Т. М. Міхеева. Хара // Энцыклапедыя прыроды Беларусі. У 5-і т. Т. 5. Стаўраструм — Яшчур / Рэдкал. І. П. Шамякін (гал. рэд.) і інш. — Мн.: БелСЭ імя Петруся Броўкі, 1986. — 583 с., іл. — 10 000 экз.