Глыбоцкі замак — абарончае збудаванне ў мястэчку Глыбокае у ВКЛ (сучасны г. Глыбокае Віцебскай вобласці). Існаваў у 16—18 ст.

Пабудаваны на месцы «двара» Зяновіча (паўднёва-заходняя частка мястэчка). Замак пазначаны на карце М. Струбіча «Тэатр вайны за Інфлянты» (1589 г.). Апісанні замка таго перыяду невядомыя, але, відаць, ён не адрозніваўся ад традыцыйных тагачасных збудаванняў з земляным валам, драўлянымі сценамі і вежамі. У час вайны Расіі з Рэччу Паспалітай 1654—1667 гг. пад сценамі замка 30 чэрвеня 1654 г. адбыўся бой паміж атрадамі войска ВКЛ і расійскімі войскамі на чале з думным дваранінам Ж. В. Кондыравым. Паводле гістарычных крыніц, 2 жніўня 1654 г. замак быў спалены ўшчэнт, а кіраўнік абароны замка полацкі падкаморы Бяганскі трапіў у палон. У 1658 г. атрад войска палкоўніка ВКЛ У. Валовіча ўзяў штурмам замак і спаліў яго, а захопленыя гарматы адвёз у Даўгінаў. Пазней замак быў адноўлены і праіснаваў да канца 18 ст. У 1700 г. у час Паўночнай вайны замак моцна пацярпеў ад вялікага пажару. Паступова замчышча было забудавана, вул. Замкавая яшчэ згадвалася ў дакументах канца 18-19 ст.

• Ткачоў М. Глыбоцкі замак // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 1: Абаленскі — Кадэнцыя. — С. 539. — 688 с. — ISBN 985-11-0314-4 (т. 1), ISBN 985-11-0315-2.
• Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 308. — 10 000 экз. — ISBN 985-11-0035-8. — ISBN 985-11-0251-2 (т. 15).

Замкі Беларусі
Дзяржаўныя	Захаваныя Стары замак у Гродне Новы замак у Гродне Камянецкая вежа Лідскі Рэшткі Крэўскі Навагрудскі Разбураныя Аршанскі Глыбоцкі Гомельскі Дрысенскі Копыскі Ляхавіцкі Мышскі Мядзельскі Рагачоўскі Радунскі Стрэшынскі Чачэрскі
Прыватныя	Захаваныя Быхаўскі Любчанскі Мірскі Нясвіжскі Рэшткі Гальшанскі Геранёнскі Смальянскі Разбураныя Глускі Горвальскі Горскі Друцкі Жаберскі Жлобінскі Іказненскі Сенненскі