Помнік абарончай архітэктуры
Мазырскі замак
Мазырскі замак, сучасная рэканструкцыя
Краіна	Беларусь
Места	Мазыр
Статус	Дзяржаўны сьпіс гісторыка-культурных каштоўнасьцяў Рэспублікі Беларусь
Мазырскі замак на Вікісховішчы

Мазы́рскі за́мак — помнік гісторыі і абарончай архітэктуры ў Мазыры. Знаходзіўся на беразе Прыпяці, на старажытным гарадзішчы. Існаваў у XV—XVIII стагодзьдзях. Аб’ект Дзяржаўнага сьпісу гістарычна-культурных каштоўнасьцяў Беларусі.

Замак у Мазыры збудавалі ў XV ст. на месцы драўляных фартыфікацыяў XIV ст. У 1520—1530-я гады яго зруйнавалі татары. Каля 1543 году замак аднавілі, ён меў тры гародні. У XVI стагодзьдзі цэнтральную частку места атачылі астрогам. Па перабудове ў 1576 годзе замак меў пяць вежаў. У 1609 годзе ён цалкам згарэў, адноўлены ў 1613 годзе.

У ходзе ваенных дзеяньняў XVII ст. замак неаднойчы разбураўся і паступова прыйшоў y заняпад. У XVIII ст. ён пераўтварыўся ў парадны замкава-палацавы комплекс, які складаўся з драўлянага палаца ў цэнтры і гаспадарчай зоны.

16 верасьня 2005 году на Замчышчы адкрыўся музэй «Мазырскі замак» («гістарычны цэнтар «Мазырскі замак»)^[1]. У трох адбудаваных з дрэва вежах знаходзіцца тры экспазыцыі: «Зброевая», «Паляўнічая» і «Адміністрацыйная».

Займаў мыс паміж шырокімі ярамі, якія праразалі высокі карэнны бераг Прыпяці. 4-гранныя вежы мелі па сем баявых ярусаў з падсябіцьцямі, а зьверху накрываліся шатровым дахам. Сьцяна з гароднямі мела два баявыя ярусы і таксама мела падсябіцьці з блянкаваньнем. Дзьве гародні былі прыстасаваныя для жылых мэтаў. На замкавым двары стаяла замкавая царква Сьвятога Спаса, некалькі 3-камэрных дамоў, скарбніца, сьвіраны, піўніца ды іншыя.

Пры дасьледаваньні Замчышча выявілі рэшткі жылой пабудовы XVI ст. з кафлянай печчу, складзенай з гаршковай і каробчатай кафлі, аздобленай геамэтрычным арнамэнтам^[2].

• Гістарычныя здымкі Замчышча
• 
  1906 г.
• 
  да 1918 г.
• 
  да 1918 г.
• 
  да 1918 г.

• Беларуская энцыклапедыя: У 18 т. / Рэдкал.: Г. П. Пашкоў і інш. — Мн.: БелЭн, 1999. — Т. 9: Кулібін — Малаіта. — 560 с. — ISBN 985-11-0155-9
• Якімовіч Ю. Драўлянае дойлідства беларускага Палесся. — Менск, 1978.

Аб’ект Дзяржаўнага сьпісу гісторыка-культурных каштоўнасьцяў Рэспублікі Беларусь, шыфр  312Е000505

• Замчышча ў Мазыры, Radzima.org