Klima asin Kapalibutan/Intro
![](https://upload.wikimedia.org/wikipedia/commons/thumb/e/e0/Change_in_Average_Temperature_With_Fahrenheit.svg/300px-Change_in_Average_Temperature_With_Fahrenheit.svg.png)
An pagburubago sa klima sarong panhalawig na pagbabago kan panahon sa satuyang kinaban magin iyan sa lokal, rehiyonal, o pankinaban na klima. An mga pagbabago na ini igwa nin halawig asin naoobserbaran na epekto sa pankagabsan kan kinaban. An mga pagbabago na ini pwedeng huli sa natural na kawsa, alagad magpuon pa kan 1800s, an mga aktibidad kan tawo an nagin mayor na rason kun tano nagkakaigwa nin siring na mga pagbabago, inot na gayo an pagsusulo kan mga fossil fuel (arog kan coal, krudo, o gas) na naghahaman man nin inaapod na heat-trapping gas.
Maninigo na magkaigwa nin hararuman na pag-intindi sa kun pano nagbabago an satuyang klima, tangani na maprepararan ta an paabuton na panahon. An pag-adal kaini nakakatabang satuya na antisiparan halimbawa an paabuton na makusog na uran, o an aasahan tang temperatura sa tiglipot, o kaya kun gurano kalangkaw an itataas kan mga lebel kan kadagatan huli sa pagpapara-init kan temperatura sa kadagatan.
Katuyuhan kan proyektong ini na maiwaras an impormasyon manungod sa pagburubago kan klima asin sa mga epekto kaini. Sa paagi kan mga artikulong ambag, masususog ta an pinakaugat kaini, kun ano an mga nagkakawsa kaini arog kan pagmimina nin petrolyo o gas, pagputol nin mga kahoy, mga ati sa kapalibutan, konsumerismo, mga planta, asin iba pa. Sa paagi nin paghahaman nin mga artikulo susog sa urulay na ini, maaraman ta man an pwedeng magin epekto kaini sa satuyang kinaban asin sa pirang sektor sa satuyang komunidad. Arog halimbawa na an tig-init pwedeng makadanyos sa produksyon nin kakanon asin sa satong mga salud. An baha pwedeng magin kawsa kan paglakop kan hilang asin makadanyos sa mga eco-sistema. An mga problema sa salud kan tawo pwedeng makadugang sa bilang kan mga nagagadan, sa produksyon nin pagkakan, asin pagigin produktibo sa mga trabaho.
Text is available under the CC BY-SA 4.0 license; additional terms may apply.
Images, videos and audio are available under their respective licenses.