A Frakzión (italienisch frazione) isch in Italien an Untreinheit van a Gemeinde (Gimeinde, Gmuan). Gemeintn, dé aus vrschiedne, óft hischtórisch eignsténdig gwåxne pewóhnte Zéntren ódr Haisrgruppm zsåmmgsétzt sein, håm die Méglichkeit, die Gemeinde in Frakziónen aufzutoaln unt gégnanåndr åzugrénzn. Die Såch isch mit an italienischn Gsétz ausn Jåhr 1954 gréglt. Die oanzelnen Ortskerne va die Frakziónen kénnen aa kilometrweit ausnåndrliegn.

Nåchn Gwóhnheitsrecht kénnen die Frakziónen gwisse Rechte wia z. B. Hólznutzung in dr Umgébung håm unt aa kirchlich a gwisse Eignsténdigkeit innrhålb van a Pfårrei. In Sidtiról håm viele Frakziónen an oagne Kirch, an Órtsfairwehr, politische Interessnvrtrétr in Gemeindråt, an Vrsåmmlungsraum unt åndre Såchn. A Toal Gemeintn sein zentralischtisch organisiĕrt, in åndre håm die Frakziónen a groaße Eignsténdigkeit.

Die flåchnméßig greschte Gemeinde va Sidtiról isch Sarntål, sie håt mit 28 Frakziónen insgesåmp 302 km² unt ca. 7000 Einwóhnr (Jåhr 2010); Meran håt pa 26 km² unt 38 000 Einwóhnr lei 3 Frakziónen außr dr Stådt. Groaße Stédt sein in Stådtviĕrtl auftoalt.

In die schweizrischn Kantóne Graupintn und Tessin sein die Gemeintn aa in Frakziónen autoalt.