Facebook inggih punika silih tunggil layanan jejaring sosial sané kantor utamannyané magenah ring Menlo Park, California, Amérika Serikat tur kaluncurang ring Pébruari 2004. Ritatkala jagi ngranjing ring facebook patut ngaryanin akun soang-soang. Ring facebook dados ngrereh sawitra antuk sané kawastanin add friend, dados ngunggahang potrékan, dados ngirim pesan, miwah ngemolihang atur piuning sané kawastanin (pemberitahuan). Facebook kaadegang olih Mark Zuckerberg sareng sawitrannyané ring Universitas Harvard tur wastan sawitranyané Eduardo Saverin, Andrew Mccollum, Dustin Moskovitz, tur Chris Hughes^[1]. Sané sareng ring situs web puniki kapertama wantah mahasisya sané taler ngranjing ring Harvard. Selanturnyané kasarengin antuk Universitas lianan, miwah sisya Sekolah Menengah Atas. Manut saking Studi Compete.com ring Januari 2019, ngegenahang Facebook dados layanan jejaring sosial sané paling akéh kaanggén olih pengguna sané aktif ring wawengkon jagaté^[2]. Wastan Facebook mawit saking murdan buku sané kaicen ka mahasisya ring warsa akademik kapertama olih pihak administrasi Universitas ring Amérika Serikat. Tetujonnyané inggih punika ngwantu mahasisya uning mahasisya sané lianan. Facebook nguningayang indik wates yusa sané dados nganggén Facebook inggih punika paling alit mayusa 13 warsa.