Rüstəm Rəhimov
Vikipediya, azad ensiklopediya
| Rüstəm Rəhimov | ||
|---|---|---|
| Ümumi məlumatlar | ||
| Doğum tarixi | 6 mart 1948[1] (76 yaş) | |
| Doğum yeri | ||
| Vətəndaşlığı | ||
| Mövqeyi | müdafiəçi | |
| Təltif və medalları | ||
 |
||
Rüstəm Rəhimov (6 mart 1948[1], Bakı) — Azərbaycanlı futbol hakimi, futbolçu, ümumittifaq dərəcəli hakim və Azərbaycanın əməkdar bədən tərbiyəsi və idman xadimi (2010).[2]
Həyatı
[redaktə | mənbəni redaktə et]
Rüstəm Rəhimov 1948-ci il martın 6-da Bakı şəhərində anadan olmuşdur.[3] O, orta təhsilini Bakı şəhərinin 132 nömrəli tam orta məktəbində başa vurmuşdur.[4]
Futbolçu karyerası
[redaktə | mənbəni redaktə et]Rüstəm Rəhimov 1960-cı illərin əvvəllərində "Neftyanik" klubunun hazırlıq qrupuna yazılmış, 1964-cü ildə isə artıq Azərbaycanın gənclərdən ibarət komandasının kapitanı seçilmişdir.[5] 1966-cı ildə həmin klubda əvəzedici heyətdə debüt edən Rəhimov daha sonra futbolçu karyerasına bir il ərzində "Dinamo Mahaçqala" komandasında davam etmişdir. Məşqçi Əhməd Ələsgərovun dəvəti ilə 1971-ci ildə növbəti iki il Tacikistanın "Pamir Düşənbə" klubunun formasını geyinmişdir. Sonralar "Dinamo Kirovabad" komandasının şərəfini qorumuş, elə burda da 1975-ci ildə futbolçu karyerasını bitirmiş, ardınca da Bakı Bədən Tərbiyəsi Texnikumunda işləməyə başlamışdır.[5]
Hakimlik karyerası
[redaktə | mənbəni redaktə et]Hakimlik fəaliyyətinə FİFA arbitri Eldar Əzimzadənin təkidi ilə 1977–1978-ci illərdə ikinci dəstənin oyunlarını idarə etməklə başlamış Rüstəm Rəhimov sonralar Sovet İttifaqında məşhur derbiləri, o cümlədən Lujniki stadionunda Dinamo Kiyev FK və Spartak Moskva FK arasındakı oyunu idarə etmişdir.[4] Rusiya SFSR-in klublarından ən çox Torpedo Moskva FK-nın oyunlarında ədaləti qorumuş Rəhimov üç dəfə — 1987-ci, 1990-cı və 1991-ci illərdə SSRİ-nin 10 ən yaxşı hakimi siyahısına daxil edilmişdir. SSRİ birinciliyi və kubok oyunlarında 120-dən çox oyuna təyinat alan hakim gümüş və qızıl medallara layiq görülmüşdür. 1993-cü ildə Azərbaycanla Gürcüstan arasında baş tutmuş və Azərbaycan millisinin qələbəsi ilə başa çatmış, Gəncə şəhər stadionunda keçirilmiş yoldaşlıq oyununu da idarə etmişdir.[6]
Rüstəm Rəhimovun peşəkar hakimlik karyerasında sonuncu dəfə idarə etdiyi oyun 1994-cü ildə Neftçi Fərqanə FK və Spartak Moskva FK arasında baş tutmuş və sonuncunun qələbəsi ilə başa çatmış Birlik kubokunun final oyunu olmuşdur.[7] Həmin vaxtdan etibarən yalnız veteranların oyununu idarə edən Rəhimov sonuncu dəfə 2013-cü ildə Heydər Əliyevin 90 illik yubileyinə həsr olunmuş Azərbaycanın və Avropanın veteranlardan ibarət komandalarının görüşündə ədaləti qorumuşdur.[5]
Rəhimov hakimliyi bitirdikdən sonra da futbol üzrə fəaliyyətini davam etdirmiş, Azərbaycanın uşaq və gənclər futbol komandalarında məşqçi və Alman-Azərbaycan Cəmiyyətində idman işləri üzrə koordinator kimi çalışmışdır.[4] 2004-cü ildə UEFA-nın təsis olunmasının 50 illik yubileyi münasibətilə Azərbaycanın "Ən yaxşı hakimi", 2010-cu ildə isə Azərbaycan Milli Olimpiya Komitəsinin "Ən ədalətli hakimi" mükafatlarına layiq görülmüşdür.[5]
FİFA-nın hakimi Tofiq Bəhramova həsr olunmuş "Hakim mərkəzi göstərir" filmində çəkilmişdir.
Rüstəm Rəhimov 2023-cü ildən Azərbaycanın nəzarətinə qayıtmış Xankəndi şəhər stadionuna baxış keçirilməsində yaxından iştirak etmişdir.[8]
İstinadlar
[redaktə | mənbəni redaktə et]- ↑ 1 2 Один из самых известных футбольных судей в истории Азербайджана празднует 60-летие.
- ↑ Hüquqi aktların vahid elektron bazası. "Azərbaycanda idmanın inkişafında xidmətləri olan şəxslərə fəxri adların verilməsi haqqında Azərbaycan Respublikası Przedinetinin Sərəncamı". e-qanun.az. 24 dekabr 2010. 2 iyul 2017 tarixində arxivləşdirilib. İstifadə tarixi: 9 dekabr 2023.
- ↑ "Azərbaycanın üç ən yaxşı futbol hakimindən biri – Rüstəm Rəhimov". Azərtac. 6 mart 2023. 5 iyun 2023 tarixində arxivləşdirilib.
- ↑ 1 2 3 Çingiz Abdullayev. "Rüstəm Rəhimovun 75 yaşına" (az.). 6 mart 2023. dekabr 2023 tarixində arxivləşdirilib. İstifadə tarixi: 9 dekabr 2023.
- ↑ 1 2 3 4 Azər Əlizadə. "Rüstəm Rəhimov: "Futbol elə səhvləri ilə gözəldir"". 31 yanvar 2023. 1 aprel 2023 tarixində arxivləşdirilib. İstifadə tarixi: 9 dekabr 2023.
- ↑ "International football referee Rüstəm Rəhimov" (ingilis). eu-football.info. 23 oktyabr 2023 tarixində arxivləşdirilib. İstifadə tarixi: 9 dekabr 2023.
- ↑ "II Кубок чемпионов Содружества 1994" (rus). 27 mart 2023 tarixində arxivləşdirilib. İstifadə tarixi: 9 dekabr 2023.
- ↑ "AFFA, PFL nümayəndələri Qarabağda – Kubokun finalı Xankəndində keçirilə bilər". Supersport. 21 oktyabr 2023. dekabr 2023 tarixində arxivləşdirilib. İstifadə tarixi: 9 dekabr 2023.
Tematik saytlar |
|---|
Text is available under the CC BY-SA 4.0 license; additional terms may apply.
Images, videos and audio are available under their respective licenses.
