Xunión del Magreb Árabe
La Xunión del Magreb Árabe (n'árabe: اتحاد المغرب العربي Ittiḥād al-Magrib al-ʿArabī) ye un alcuerdu d'interaición comercial robláu'l 17 de febreru de 1989 en Marrakech polos xefes d'Estáu d'Arxelia, Libia, Marruecos, Mauritania y Tunicia.
Descripción
[editar | editar la fonte]El so orixe inmediatu ta na primer cume magrebín, celebrada n'Arxel el 10 xunu de 1988. Les sos instituciones más relevantes son: el Conseyu Presidencial, compuestu polos xefes d'Estáu de los cinco países miembros baxo la presidencia por veces de caún d'ellos mientres seis meses; el Conseyu de Ministros d'Asuntos Esteriores; el Comité de Siguimientu, compuestu por un miembru de cada gobiernu; el Conseyu Consultivu, compuestu por diez diputaos de cada parllamentu nacional; un muérganu xudicial formáu por dos xueces de cada país, encargáu d'arbitrar los pleitos ente Estaos miembros y una Secretaría Xeneral del Conseyu Presidencial.
Los xefes d'Estáu firmantes del tratáu orixinal fueron: el rei Hasan II de Marruecos; el presidente tunecín Zine El Abidine Ben Ali, el presidente arxelín Chadli Bendjedid, el líder libiu Muammar al-Gaddafi y el presidente mauritanu Maaouya Ould Sid'Ahmed Taya.
La rivalidá tradicional ente Marruecos y Arxelia, amás de la cuestión ensin resolver sobro la soberanía d'El Sáḥara Occidental bloquiaron les xuntes d'esti organismu dende l'añu 1994. La última conferencia d'altu nivel, que tendría de tener llugar en 2005, foi atayada pola negativa de Marruecos a participar debíu al sofitu verbal d'Arxelia a la independencia d'El Sáḥara Occidental. El Sáḥara Occidental foi una colonia española hasta que foi invadíu per Marruecos y Mauritania en 1975. Dende entós Arxelia sofitó siempres al movimientu de lliberación saḥarianu, el Frente Polisariu.[1] Anque anguaño la UMA nun ta funcionando, los gobiernos de los países miembros sobremanera de Marruecos pretenden reactivar les rellaciones ya instituciones d'esti organismu económicu.
Notes y referencies
[editar | editar la fonte]- ↑ Aggad, Faten.
Enllaces esternos
[editar | editar la fonte]Text is available under the CC BY-SA 4.0 license; additional terms may apply.
Images, videos and audio are available under their respective licenses.