S4C
canal de televisión y difusora
Llocalización
Sede	Caerfyrddin
Coordenaes	51°51′35″N 4°19′44″W / 51.8597702°N 4.3288254°O / 51.8597702; -4.3288254
S4C S4C (Reinu Xuníu)
Historia
Fundación	1982
Organigrama
Dueñu	S4C Authority (en)
Direutor executivu	Owen Evans (1r ochobre 2017)
Participación empresarial
Propietariu de	ver Hughes and Sons (en)
Web oficial

S4C ye una canal de televisión de Gales.

El 1 de payares de 1982 llegó a les pantalles S4C, la primer televisión rexonal europea y la primera creada col enfotu de normalizar un idioma minorizáu. Nos sos empiezos, la cadena emitía en galés y inglés al compartir frecuencia cola estatal Channel 4. Sicasí, l'aparición de la televisión dixital nel 2010 permitió la separación de les dos señales. La emisora ta dirixida pola Autoridá de la Canal Cuatro de Galés, un organismu públicu independiente designáu pol Departamentu de Cultura, Medios y Deporte del Gobiernu británicu, que ye’l que tien les competencies en materia audiovisual y quien financia la canal al traviés d'un canon.

La creación de S4C supunxo una llucha llarga del movimientu de reivindicación llingüística galés, que dende’l primer momentu tuvo en cuenta la importancia de la televisión pa salvar el so idioma. Mesmamente, Gwynfor Evans, el líder de Plaid Cymru, principal partíu nacionalista galés, llegó a ponese en fuelga de fame. A la fin, el Gobiernu de Thatcher anunció que Gales diba tener una canal independiente na so llingua, pero con emisión dientro de la frecuencia de Channel 4.

La primer programación de S4C foi’l 1 de payares de 1982 a les 18:00 hores, un día enantes del nacimientu de Channel 4. L’aparición de la canal supunxo que los programes en galés de la BBC –que se convirtió nun proveedor de conteníos de S4C– pasaran a la emisora nueva. Y ye qu'una de les carauterístiques d'esta televisión ye que nun produz nengún espaciu de los qu'emite, polo que los conteníos se reparten ente BBC-Gales y les productores independientes del país.

Otra manera, la canal nació nun primer momentu como emisora billingüe, con programes en galés nos horarios de máxima audiencia –ente les 18 y les 22 hores– y colos espacios n'inglés de Channel 4 nel restu del horariu. Per otru llau, pa facilitar que los falantes d'inglés pudieran siguir la emisión, el teletestu de S4C ufría la programación con subtítulos n'inglés, amás d'en galés pa los que taben deprendiendo l'idioma. Nel 2010, col apagón analóxicu, S4C dexó de compartir frecuencia y pasó a emitir programes les 24 hores.