Ramón Calderón
16. presidente del Real Madrid (es) 2 xunetu 2006 - 16 xineru 2009
Vida
Nacimientu	Palencia, 26 de mayu de 1951 (73 años)
Nacionalidá	España
Residencia	Madrid
Estudios
Estudios	Universidá de Navarra
Llingües falaes	castellanu
Oficiu
Oficiu	abogáu
Trayeutoria
ramoncalderon.org

Ramón Calderón Ramos (26 de mayu de 1951, Palencia) foi presidente del Real Madrid. Sobrín-bisnietu del ex ministru Abilio Calderón y llicenciáu en Drechu pola Universidá de Navarra (1974).

Principal opositor del llabor de Ramón Mendoza al frente de la presidencia del Real Madrid na década de los 90, foi directivu del club mientres la presidencia de Florentino Pérez.

Foi elixíu'l 2 de xunetu de 2006, tres vencer pol votu presencial (8.343 votos) a los otros candidatos Juan Palacios (8.098 votos), Juan Miguel Villar Mir (6.702 votos), Lorenzo Sanz (2.377 votos) y Arturo Baldasano (1.581 votos). Nes sos propuestes eleutorales afirmó que ficharía al xugador del AC Milan, Kaká, al estremu holandés Arjen Robben y al volante español Cesc Fàbregas, actualmente del Arsenal FC. Namái consiguió la robla del holandés, un añu depués de prometelo, cumpliendo asina únicamente una de les sos trés propuestes. Nel so equipu destacó como direutor de fútbol Pedja Mijatović.

Los sos primeros fichaxes fueren el del nuevu entrenador, Fabio Capello y los de los xugadores de la Juventus Fabio Cannavaro y Emerson, estos últimos el día 19 de xunetu de 2006.

Los fichaxes del Real Madrid na temporada 2006-2007 fueron, amás de Cannavaro y Emerson, Ruud van Nistelrooy, procedente del Manchester United, y Mahamadou Diarra, procedente del Olympique Lyonnais. Tamién llegó al club blancu'l sevillanu José Antonio Reyes, en calidá de cedíu empara del brasilanu Júlio Baptista. Amás, el 14 de payares de 2006 presentó un nuevu fichaxe, Marcelo, un xoven llateral procedente del Fluminense de Brasil. Los sos últimos fichaxes de la temporada 2006-2007 fueron dos xóvenes arxentinos. El primeru, Gonzalo Higuaín, procedente de River Plate y el segundu, Fernando Gago, procedente de Boca Juniors.

El 28 de xunu de 2007, la Xunta Direutiva qu'él preside decide destituyir a Fabio Capello del so cargu de entrenador del Real Madrid (con 2 temporaes más de contratu por delantre), asina como a tol so Cuerpu Téunicu y miembros de la Direición Deportiva que siempre lu apoyaron, como Franco Baldini. Esta destitución produzse díes depués de que l'equipu de fútbol entrenáu por esti Cuerpu Téunicu ganare in extremis el títulu de Lliga, tres 4 años ensin ganar un solu títulu. Contrató a Bernd Schuster pa sustituyir a Capello al frente del Cuerpu Téunicu, por mor del mal xuegu del equipu.

Pa la campaña 2007-2008, tres algamar el títulu de lliga y contratar a Bernd Schuster, Ramón Calderón y la so Xunta Direutiva fichó a Metzelder (B.Dortumund), Képler Laveran Lima Ferreira (Pepe) (con un coste de 30 millones d'euros, procedente del Oporto), Saviola (procedente del F.C. Barcelona), Dudek (Liverpool), los holandeses Wesley Sneijder (Ájax) y Drenthe (Feyenord), el llateral zurdu Gabriel Heinze (M. United) y por últimu'l tamién holandés y mentáu anteriormente Robben (Chelsea).

El 12 de febreru de 2008 ye nomáu Vicepresidente del Comité de Competición de Clubes de la UEFA.