Milla náutica
unidá de llonxitú

La milla náutica (NM, del inglés: Nautical Mile), tamién denomada milla marítima, introdúxose na náutica fai sieglos, y adautóse con llixeres variances por tolos países d'occidente. Úsase entá anguaño por tolos navegantes del mundu, inclusive aquellos que tan avezaos al Sistema Métricu Decimal. Tamién ye d'usu na navegación aérea.^[1]

La definición de la milla marina ta rellacionada coles dimensiones de la Tierra. Ye la distancia equivalente al arcu d'un minutu sobro un círculu máximu. Tomando como círculu máximu l'Ecuador, la división de la llonxitú de la llinia ecuatorial (redondeada en 40.000 km pal cálculu) ente los 21.600 minutos totales, da como cociente: 1.851,85 m, que se redondea en 1.852 m.

Sicasí, la Tierra nun ye una esfera perfeuta, (sinón un xeoide), polo que si se toma un círculu máximu que nun seya l'Ecuador, por exemplu un meridianu, la medición de la milla náutica pue cimblar nunos pocos metros según l'allugamientu. Poro, la Conferencia Hidrográfica Estraordinaria Internacional de Mónacu adoptó en 1929, una milla náutica d'esautamente 1852 metros en tolos países, (sacante los Estaos Xuníos que s'amestaron a esta definición en 1954, y los ingleses y el so Imperiu que lo fixeren en 1970, desdexando la so Milla d'Almirantalgu de 1.853,184 m ó 6.080 ft).

Arriendes, 1 milla náutica, puede dixebrase en 10 cables. Poro, 1 cable equival a 185,2 metros.

Otra unidá rellacionada ye'l nuedu, que ye la velocidá d'una milla náutica por unidá d'hora.

Nes cartes náutiques de Proyeición Mercator cada minutu de llatitú midíu sobro los márxenes esquierdu o drechu, representen una milla.

• Wikimedia Commons tien conteníu multimedia tocante a Milla náutica.