Movimientu mod
![](https://upload.wikimedia.org/wikipedia/commons/thumb/7/71/Roundel_of_the_United_Kingdom.svg/150px-Roundel_of_the_United_Kingdom.svg.png)
El movimientu mod (del inglés modernist) ye una subcultura urbana qu'afonda los sos raigaños en Londres ente lo cabero de los 50 y lo primero de los 60. Esti movimientu abarca delles subtribus como los hardmods, los suedeheads o los skinheads.
Los elementos más importantes a citar nesta tribu son:
- La moda: destacaben los traxes fechos a midida pa les folixes, conocíes como Allnighters).
- La música: dende'l soul afroamericanu, pasando pel ska xamaicanu, pel beat británicu y el R&B.
- Les scooters: siempres de les marques italianes Vespa o Lambretta.
Tamién podría añadise'l consumu de drogues como les anfetamines na escena orixinal, que se reduxo enforma na escena del revival qu'hebo a finales los 70 y que s'estendió a los Estaos Xuníos d'América nos entamos de los 80, destacando nel sur de California. Inda, falase agora d'un segundu revival.
Orixe del términu Mod
[editar | editar la fonte]Nun primer momentu los mods yeren aquellos qu'escuchaben jazz modernu en contraposición a los siguidores del tradicional (trads). La primer vegada que foi emplegáu esti términu foi nel llibru Principiantes de Colin MacInnes, au se discribía esti términu como un mozu que vistía traxes italianos. El términu nun guarda rellación coles otres definiciones de modernismu.
Historia
[editar | editar la fonte]Los oríxenes
[editar | editar la fonte]Fálase de dellos oríxenes de los mods, toos rellacionaos con clases sociales. Quiciabes la más estendida ye la idea de Dick Hebdige que diz que los mods yeren xente de clas obrera a la que-y prestaba vistir bien. Otra idea ye la de Mary Anne Long, la cuala diz que yera xente xudío del proletaríau de más altu nivel o de clas media del East End de Londres o otres zones los suburbios. Per otra parte, el sociólogu Simon Frith diz que la escena mod funde los sos raigaños na cultura beatnik de los 50 y nos bohemios londinenses y Steve Sparks diz direutamente que los mods nun yeren de clas obrera.
Los coffee bars yeren llugares perfrecuentaos pola mocedá porque piesllaben más tarde que los pubs y teníen la posibilidá de pinchar los discos que-yos petare porque teníen la posibilidá de trayelos de casa. Anque orixinalmente poníense jazz y blues pero a entamos los 60 decantáronse más pal R&B, más del preste la so clientela qu'agora yera de toles clases sociales.
Esti averamientu a la música prieto llevó a la mocedá a averase a coleicionistes de discos que-yos amosaron estilos nuevos como'l soul y el ska. Tamién entamaron a interesase pol estilu de vistir continental (sobre too francés ya italianu), que conocíen al traviés de revistes y cine. Col pasu del tiempu entamaron a xuntase al mundu de les drogues anfitamíniques y a los scooters (con un orixe más práuticu qu'estéticu).
La escayencia
[editar | editar la fonte]Pel branu del añu 1966 la escena mod foi escayendo según dellos pola comercialización y pola perda d'orixinalidá, yá que los estilos de vistir taben siendo marcaos por multinacionales y programes de televisión como Ready Steady Go! en cuenta de selo por parte de la mocedá, lo cualo ye una idea fundamental na mentalidá los mods: l'individualismu.
Nesta dómina crecíen el rock sicodélicu y la cultura hippie y disminuía la mod dao que dellos grupos dexaron de considerase miembros d'estos, como The Who. Amás, los mods orixinales taben faciéndose mayores y teníen d'abandonar esa vida en pro d'una más familiar, poro nun yera posible gastar tantu dineru en clubs, discos y scooters. Tamién, el movimientu contaminóse col multicolorismu, la pasividá y les drogues sicodéliques de los hippies.
Nesi momentu ye cuando apaecen los hard mods que refugaben l'elitismu na escena y qu'a finales los 60 tornaron skinheads. Esta tendencia nueva dientro de los mods surdió en zones de contautu ente la mocedá xamaicano y de les indies occidentales, ente los cuales destacaben los rudeboys, y la mocedá inglés. Asina, creóse una nueva tendencia interracial ya intercultural na qu'entamó a destacar el ska como música más popular pol so sen non comercial.
Los primeros skinheads caltuvieron dellos elementos de la estética mod; polos Fred Perry, camises Ben Sherman, pantalones axustaos o Sta-Prest, pero mecíos con elementos de clas obrera como tirantes y botes de trabayu de Dr.Martens (pola so fabricación nes islles), amás, entamaron a rapase la tiesta por tres motivos fundamentales: asemeyase al pelo curtiu de los negros, trabayar na industria y les griesques na cai, amás dizse que yera pa dir a la escontra del pelo llargo de los hippies.
Los mods foron parte tamién de los entamos de la escena del Northern Soul, nel norte d'Inglaterra, na que destacaba'l Wigan Casino y onde s'escuchaba soul norteamericanu.
El revival
[editar | editar la fonte]Entamó a lo cabero los 70 nel Reinu Xuníu cuando miles de mods entamaron a participar nos scooter rallies de Scarborough o de la Islla de Wight. Esto foi inspiráu pol filme Quadrophenia del añu 1979 y poles nueves bandes como The Jam (na que tocaba Paul Weller, el modfather) y Secret Affair, les que taben influyíes pola New Wave y pol punk ingleses. Tamién nos años 90, la escena Britpop tuvo a esgaya d'influyencies mod, con bandes como Oasis o Blur.
La escena Mod n'España
[editar | editar la fonte]Historia
[editar | editar la fonte]Surdió aproximadamente nos años 80 con bandes como los lleoneses Los Flechazos y los catalanes Brighton 64 amás de la música tradicionalmente mod como'l Northern Soul y el R&B que reactiváronse.
N'Asturies destaquen Doctor Explosión. Cuando desapaeció la banda lleonesa la escena mod resintióse y munchos d'aquellos que se ficieron d'ella por siguir a la banda, abandonáronla y pasó a ser dalgo minoritario como ye agora, aunque se fala d'un nuevu revival.
Anguaño
[editar | editar la fonte]Inda hai dellos festivales mods nel Estáu Español como'l Purple Weekend (Lleón), el Beat Goes On (Lluanco) o'l Go!Lleida (Lleida), pero'l más importante ye l'Euroyeye que vien celebrandose cada añu dende hai 15 na ciudá de Xixón pel branu. Tamién hai que destacar que Xixón ye una ciudá con una escena mod importante habiendo grupos musicales, como Doctor Explosión, llocales como La Folixa Sound Club y grupos sociales como Xixón Mods.
Referencies
[editar | editar la fonte]Enllaces esternos
[editar | editar la fonte]Text is available under the CC BY-SA 4.0 license; additional terms may apply.
Images, videos and audio are available under their respective licenses.