Xosé Caveda y Nava
Diputáu nel Congresu de los Diputaos d'España
Vida
Nacimientu	Villaviciosa, 1796[1]
Nacionalidá	España
Muerte	1882[1] (85/86 años)
Familia
Padre	Francisco de Paula Caveda y Solares
Familia	ver Rita Caveda y Solares (tía)
Estudios
Llingües falaes	castellanu asturianu
Oficiu	políticu, escritor, historiador del arte
Llugares de trabayu	Madrid
Premios	ver Gran Cruz de la Orde de Sabela la Católica Gran Cruz de la Orde de Carlos III
Miembru de	Real Academia Española Real Academia de la Historia Real Academia de Belles Artes de San Fernando

Xosé Caveda y Nava (1796, Villaviciosa – 1882), foi un escritor asturianu, ún de los qu'entamaron la escritura n'asturianu.

Yera fíu de Francisco de Paula Caveda y Solares, amigu de Gaspar Melchor de Xovellanos. Entamó los estudios nel Institutu Xovellanos de Xixón, treslladándose dempués a Madrid. La invasión francesa y la muerte de so padre, interrumpiéron-y los estudios, magar que siguió la so formación d'un mou autodidacta en Villaviciosa, ingresando en 1818 na Real Academia de la Historia.

Durante'l Trieniu Lliberal formó parte de la Milicia Nacional, polo que, cola restauración del absolutismu hebo de tapecese na so ciudá natal. Tres de la muerte de Fernandu VII foi miembru de la Xunta Xeneral del Principáu d'Asturies, hasta la so desapaición cuando va sustituyila la diputación provincial.

Formó parte de les files moderaes y foi diputáu en Cortes en 1837. Escribió una «Memoria histórica sobre la Junta General del Principado» (1834) y «Coleición de poesías en dialecto asturiano» (1839) que foi'l primer llibru imprentáu n'asturianu; una esbilla de poesíes, con delles propies que foi modelu lliterariu pa los escritores n'asturianu del sieglu XIX. La imaxe rural qu'espeyó nes sos obres devino un tópicu.

• Wikimedia Commons acueye conteníu multimedia sobre Xosé Caveda y Nava .