El basónimu (tamién basiónimu) ye un términu usáu en botánica, reguláu pol Códigu Internacional de Nomenclatura Botánica (o ICBN, del inglés International Code of Botanical Nomenclature), y consiste nel nome científicu col que foi nomáu o catalogáu orixinalmente un taxón.

Pa torgar ambigüedaes o duldes col nome científicu, una propuesta de reclasificación ha de mentar siempres el basónimu, anque'l nome güei día taxonómicamente válidu o aceptáu seya distintu.

Por casu, en 1758 Carlos Linneo describió a Staphylinus politus. Anguaño esi taxón conozse como Philonthus politus. Nesti sen, la forma correuta de citar el nome sería:

• Philonthus politus (L., 1758) → Nome válidu
• Staphylinus politus L., 1758 → Basónimu (nome orixinal)

Otru exemplu de la botánica representa Picea abies (L.) H.Karst. basáu en Pinus abies L.

Un exemplu práuticu más: una parte mínima de les especies del xéneru Carthamus L., 1753 (Asteraceae) foi clasificada en 1990, por López González nel xéneru Phonus Hill, 1762, con Carthamus arborescens L., 1753 como basónimu, pasando a denomase Phonus arborescens (L.) G. López (con L. ente paréntesis - (L.) - pa denotar que la descripción orixinal faila Linneo baxo otru taxón xenéricu, nesti casu Carthamus, siguíu de G. López quien ye l'autor que camudó la especie arborescens del xéneru Carthamus al xéneru Phonus).^[1]