Ana Oramas
Ana María Oramas González-Moro (17 de xunetu de 1959, Santa Cruz de Tenerife) ye una política española que forma parte de Coalición Canaria.[3] Ye diputada nacional pola provincia de Tenerife dende 2007 y vocera de Coalición Canaria nel grupu mixtu. Foi tamién alcaldesa de San Cristóbal de La Laguna dende 1999 hasta 2008.[3]
Biografía
[editar | editar la fonte]Ana Oramas nació en Santa Cruz de Tenerife en 1959 y crióse nuna familia numberosa, siendo la mayor de 10 hermanos.[4] Llicencióse en Ciencies Económiques pola Universidá de La Laguna.
La so carrera política siempres tuvo venceyada a Coalición Canaria. En 1979 foi escoyida conceyal nel conceyu de Santa Cruz de Tenerife, y dende 1991 hasta 1999 llogró l'acta de diputáu nel Parllamentu de Canaries. Mientres el gobiernu de Manuel Hermoso (1993 a 1999) ocupó diversos cargos na alministración autonómica.
En 1999, Coalición Canaria escoyó-y pa postular a l'alcaldía de San Cristóbal de La Laguna. Anque'l so partíu nun foi'l más votáu, un pactu col Partíu Popular dio-y el cayáu de mandu. Dende entós llogró revalidar l'alcaldía en 2003 con mayoría simple y en 2007 con mayoría absoluta, anque arrenunció al cargu en 2008 por motivos familiares.[5]
En xunu de 2007 foi escoyida diputada nacional nel Congresu de los Diputaos pola Provincia de Santa Cruz de Tenerife, y dende 2008 ye la vocera de Coalición Canaria na cámara baxa, en sustitución de Paulino Rivero. Amás foi voceru del grupu mixtu en diverses comisiones permanentes.
Referencies
[editar | editar la fonte]- ↑ URL de la referencia: http://www.congreso.es/portal/page/portal/Congreso/Congreso/Diputados/BusqForm?_piref73_1333155_73_1333154_1333154.next_page=/wc/fichaDiputado?idDiputado=27&idLegislatura=13. Data de consulta: 18 agostu 2019.
- ↑ URL de la referencia: http://www.anaoramas.com/biografia/.
- ↑ 3,0 3,1 «Entrada na páxina oficial del Congresu de los Diputaos». Consultáu'l 11 de xunetu de 2017.
- ↑ «Oramas, perfil de la candidata CC, eleiciones generales 2011». RTVE (3 de payares de 2011). Consultáu'l 27 d'agostu de 2015.
- ↑ «Ana Oramas: ´Mi etapa como alcaldesa ha terminado y ahora quiero darle una oportunidad a mi familia´». La Opinión de Tenerife (14 de payares de 2008). Consultáu'l 27 d'agostu de 2015.
Enllaces esternos
[editar | editar la fonte]- Perfil d'Ana Oramas nel sitiu web del Congresu de los Diputaos
- Blogue personal d'Ana Oramas
Text is available under the CC BY-SA 4.0 license; additional terms may apply.
Images, videos and audio are available under their respective licenses.