Átomu
entidad química (es) y partícula compuesta (es)

L'átomu^[1] (del llatín: atomum, y ésti del griegu: ατομον, indivisible) ye la menor cantidá d'un elementu químicu que tien esistencia propia, y que nun ye posible dividir con procesos químicos.

Anque la mayor parte d'un átomu ye espaciu vacíu, los átomos tán compuestos de partícules más pequeñes. Por tradición suelen dividise en:

• corteya: la parte más grande, formada por una nube d'electrones
• nucleu: nel centru, compuestu polos nucleones (protones y neutrones)

El volumen del nucleu ye 10.000 veces más pequeñu que'l total del átomu, ensin embargu tien tola masa atómica concentrada n'él, yá que los electrones tienen una masa despreciable.

Nel casu d'átomos n'estáu neutru'l númberu d'electrones ye idénticu al de protones, que ye lo que caracteriza a cada elementu químicu. El númberu de protones d'un determináu átomu llámase númberu atómicu y determina'l so llugar na tabla periódica de los elementos.

Según la composición del nucleu los átomos llámense:

• Isóbaros: Los átomos col mesmu númberu másicu.
• Isótonos: Los átomos que tienen el mesmu númberu de neutrones y distintu de protones.
• Isótopos: Los átomos que tienen el mesmu númberu de protones y distintu de neutrones.

Les propiedaes químiques de los átomos isótopos son asemeyaes, pero les de los isótonos y isóbaros nun lo son.