Dr Richard Steiff (* 7. Februar 1877 z Giinga an dr Brenz, † 30. März 1939 en Jackson em amerikanischa Bundesstaat Michigan) isch dr Neffe vo dr berihmda Schbiilzeigherstellere Margarete Steiff ond sowohl a Erfender wia au a Gschäftsmôô gwäa.

Dr Richard Steiff kommt am 7. Februar 1877 z Giinga an dr Brenz uff d Welt. Nôch dr „normala“ Schual bsuacht’r noh en Stuegert d Kunschtgewerbeschual. En dera Stadt gôht’r en seira freia Zeit emmr môl wiidr en da „Nill’scha Tiirgarda“. Dô dren hôt’r’s hauptsächlich uff d Bära abgseha. Stondalang sitzt’r vôr deane ihrem Gehege ond zoichnet vo selle Viicher Skizza uff-nen Block. Wia der Kerle nô 20 Jôhr alt ischt, tridd’r en da Betriib ei, wo vo seira Tande Margret grindet wôrra ischt. Uff Grond vo seine Bära-Skizza entwicklet’r em Jôhr 1902 da so gnannda Steiff-Bära mit dr Bezoichnong „55 PB“ als Schbiilzeig fir d Kender.

1903 fendet en Leipzig a indrnazionala Schbiilzeigmesse stadd. D Firma Steiff präsendiirt deet au ihre nuie Plisch-Bära. An de erschde baar Däg wend de selle abr kaum vo ebbr beachdet. Erscht kurz bevôr dui Messe em Ende zuagôht, kommt a Amerikaner an da Messestand ond kauft älle hondert Ausstellongsstick. Gleichzeidich bschdellt’r noh weitre 3.000 Exemplar. Des isch dr Ôfang vo-ma weltweida Erfolg. Jetzt hôt d Firma Steiff au gnuag Geld, om a ganz moderna Fabrikhall aus Bedoo ond Stahl baua zo lau. S dauret et lang, ond des Gebeide kriagt vo de Giingener Eiwohner da Nama „Jongfraua-Aquariom“, weil de meischde Beschäfdigte ledige Fraua send. Om dr Chefin zo ermeglicha, au zor Produkzioo ens obere Stockwerk zo komma, lôht dr Richard fir sei Tande a Rampe baua, wo se mit ihrem Rollstuahl nuffahra kôô. Em Jôhr druff (1904) kriagt Firma Steiff bei dr Weltausstellong en St. Louis nomôl a Bschdellong, desmôl ibr 12.000 Stick. Dô drfir wuud d Margarete Steiff zamma mit ihrem Neffa mit-ra Goldmedallje auszoichnet, was dr hechschde Preis bei dera Vrôstaldong ischt.

Dr „Bär PB 55“ bleibt abr et de oinzig Erfendong vom Richard Steiff. Schbäter entwicklet’r noh da so gnannda „Rolloplan“. Des ischt a Dracha, wo mr Luftaufnahma drmit macha kôô, zom Beischbiil vo dr Steiff’scha Fabrik ond ihrer Omgeabong sowia vo ganz Giinga. Uff dui Erfendong wuud schliaßlich au d Fihrong vo dr kaiserlicha Armee uffmerksam ond teschdet se, ob mr-se villeicht au zo milidärische Zweck eisetza kôô. Abr bald stellt sich raus, dass dô drfir dui Erfendong et en Frôg kommt, weil der Dracha z langsam ischt.

Am 30. März 1939, 30 Jôhr nôch-em Ableaba vo seira Tande, schliaßt dr Richard Steiff z Jackson en de USA, wo-nr sich grad gschäftlich uffhelt, seine Auga fir emmer. 62 Jôhr alt isch’r wôrra.

• Günther Pfeiffer: 125 Jahre Steiff Firmengeschichte – Die Margarethe Steiff GmbH, Heel Verlag GmbH, Königswinter 2005, ISBN 3-89880-387-2

• Firmenhistorie uf steiff.com
• Steiff, "Knopf im Ohr" – d Gschicht vo dr Firma Steiff em playmo-portal (Memento vom 10. Dezämber 2013 im Internet Archive)
• Wie man einen Freund herstellt Artikel uf stern.de vom 9. Dezember 2003