Dr Marcel Marceau (* 22. Merz 1923 z Stroossburg, Frankriich; † 22. Septämber 2007 z Bariis, äigentlig Marcel Mangel) isch e berüemte französische Pantomim gsi. S Publikum het en as „Bip“ kennt, e tragikomische Gloon im e Sträifehemmli mit eme wiss gschminkte Gsicht, eme verbüülte Siidehuet und ere rote Blueme.

1942 het sich dr Marceau, wo Juud gsi isch, dr Résistance aagschlosse, het ghulfe, jüdischi Chinder in d Schwiz schmuggle, und schliesslig in dr franzöösische Armee gege die dütsche Bsatzer kämpft. Si Vater isch vo de Nazi z Auschwitz ermordet worde. 1946 het dr Marceau si Usbildig im Bariiser Sarah Bernhardt Theater aagfange. Denn het er in dr Compagnie vom Barrault dr „Harlekin“ in dr Pantomime Baptiste gspiilt und druf äigeni Mimodrama afo uffüere. 1947 isch er z Bariis zum erste Mol as „Monsieur Bip“ ufdräte. In dere Rolle isch er wältberüemt worde und het sä mee as 40 Joor lang uf dr ganze Wält gspiilt.

Erfolg het dr Marceau au as Mooler und Zäichner gha. Sini Wärk si u. a. z Dütschland, Frankriich, Japan und in de USA usgstellt worde. Er het meereri Büecher gschriibe und illustriert, drunder Die Geschichte des Bip und Pimporello, d Gschicht vom ene alte Stroossemim und däm si Zuenäigig zum ene chliine verwilderete Mäitli, en Ommaasch an The Kid vom Charlie Chaplin.

Dr Marceau het e Hufe Künstler us alle Schaner bis hüte beiiflusst. Dr Samuel Beckett het er zum pantomimische Finale im Endspiel inspiriert. Dr Samy Molcho, Milan Sladek und Jango Edwards verzelle vo sim Iifluss uf iiri Karriere. Dütschi Mime wie dr JOMI, Peter Makal und Rolf Mielke häi bi iim glert. Dr Schauspiiler Anthony Hopkins und dr Dänzer Rudolf Nurejew häi sich uf si Vorbild berüeft. Dr Michael Jackson isch zum Moonwalk, wo spööter zu sim Markezäiche worde isch, dur em Marceau si Marsch gegen e Wind inspiriert worde.

• Die Geschichte von Bip („The story of Bip“). Betz Verlag, Münche 1976, ISBN 3-7641-0064-8.
• Pimporello. Owen Books, London 1991, ISBN 0-7206-0813-9.
• Bip in a Book. Stewart, Tabori & Chang, Nöi York 2001, ISBN 1-58479-130-6.

 Commons: Marcel Marceau – Sammlig vo Multimediadateie

• Mime Centrum Berlin (Informazionszentrum mit Buech- und Videomaterial über e Marcel Marceau)
• Kurzporträt
• „Das Gute zeigen“, taz, 11. Juli 2005, Interviuu
• Marchel Marceau uf dr Website vo dr Académie des Beaux-Arts (französisch)
• Le mime Marcel Marceau, Interviuu (französisch)